వినాయకుడి మట్టి విగ్రహాలే ఎందుకు? ప్లాస్టర్ ఆఫ్ పారిస్ విగ్రహాలెందుకు వద్దు?

ఇంటర్నెట్ డెస్క్: వినాయక చవితి సందర్భంగా గణపతి విగ్రహాలను ప్రతిష్ఠించి పూజించడం ఆనవాయితీ. ప్లాస్టర్ ఆఫ్ ప్యారిస్‌ (PoP)తో తయారు చేసిన వినాయకుడి విగ్రహాలను కాకుండా మట్టి విగ్రహాలకే ప్రాధాన్యం ఇవ్వాలని మన పెద్దలు చెబుతుంటారు. పర్యావరణ పరంగానూ మట్టి విగ్రహాలనే ఎంచుకోవాలని నిపుణులు సూచిస్తున్నారు. ఇంతకీ PoP విగ్రహాలను ఎందుకు తీసుకోకూడదు? వినాయకుడి మట్టి విగ్రహాలనే ఎందుకు తీసుకోవాలి? వివరంగా తెలుసుకుందాం..

PoP వినాయక విగ్రహాలతో సమస్య

సహజమైన మట్టితో తయారు చేసిన విగ్రహాలు నీటిలో నిమజ్జనం చేసిన తర్వాత క్రమంగా కరిగి ప్రకృతిలో కలిసిపోతాయి. కానీ PoPతో తయారు చేసిన విగ్రహాలు నీటిలో త్వరగా కరగవు. వీటికి ఉపయోగించే కొన్ని రసాయన రంగులు కూడా నీటిని కలుషితం చేసే అవకాశం ఉంది. దీంతో నీటిలోని జీవులకు, చేపలకు హాని కలగడంతో పాటు నిమజ్జనం తర్వాత చెరువులు, సరస్సులు, ఇతర నీటి వనరుల్లో విగ్రహాల అవశేషాలు పేరుకుపోతుంటాయి. అందుకే పర్యావరణ పరిరక్షణ కోసం సహజ మట్టి విగ్రహాలను ఉపయోగించాలని పర్యావరణవేత్తలు సూచిస్తున్నారు.

పర్యావరణ అనుకూల గణేశుడి ప్రత్యేకత

ప్లాస్టర్ ఆఫ్ ప్యారిస్ (PoP), ప్లాస్టిక్, హానికరమైన రసాయనాలు ఉపయోగించకుండా సహజ పదార్థాలతో తయారు చేసిన గణేశ్ విగ్రహాలను పర్యావరణ అనుకూల విగ్రహాలుగా చెప్పొచ్చు. ఇలాంటి విగ్రహాల తయారీలో సహజ మట్టి, ఎర్రమట్టి వంటి పదార్థాలను ఉపయోగిస్తారు. వీటికి సహజ రంగులను ఉపయోగిస్తే పర్యావరణానికి మరింత అనుకూలంగా ఉంటుంది. అందుకే PoP విగ్రహాల కంటే మట్టి విగ్రహాలనే తీసుకోవడం మంచిదని మన పెద్దలు చెబుతున్నారు.

వినాయకుడి మట్టి విగ్రహాలను నీటిలో నిమజ్జనం చేసిన తర్వాత అవి క్రమంగా కరిగి మట్టిలో కలిసిపోతాయి. దీంతో PoP విగ్రహాలతో పోలిస్తే పర్యావరణంపై ప్రభావం తక్కువగా ఉంటుంది. ప్రస్తుతం ‘సీడ్ గణేశ్’ లేదా ‘ట్రీ గణేశ్’ విగ్రహాలు కూడా అందుబాటులోకి వచ్చాయి. వీటి లోపల మొక్కల విత్తనాలను ఉంచుతారు. నిమజ్జనం తర్వాత మట్టిని కుండీలో వేసి నీరు పోస్తే కొంతకాలానికి మొక్క పెరిగేలా వీటిని తయారు చేస్తున్నారు.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

గ్యాస్‌, గుండెపోటు మధ్య తేడా ఏంటి? ఈ విషయాలు తెలుసుకోండి

నిద్రలో చెమటలు పడుతున్నాయా? కారణం ఇదే కావచ్చు!