వారాంతాన భారీ లాభాలతో ముగిసిన భారత స్టాక్ మార్కెట్లు

ఆంధ్రజ్యోతి, జులై 10: దేశీయ స్టాక్ మార్కెట్ సూచీలు (Sensex, Nifty) నేడు అద్భుతమైన జోరును ప్రదర్శించాయి. గ్లోబల్ మార్కెట్ల నుంచి సానుకూల సంకేతాలు, ప్రధానంగా ఐటీ (IT), బ్యాంకింగ్ షేర్ల రంగ షేర్లలో కనిపించిన భారీ కొనుగోళ్ల అండతో నేడు మార్కెట్లు సరికొత్త ఉత్సాహాన్ని సంతరించుకున్నాయి.

రోజంతా బుల్స్ పూర్తి ఆధిక్యాన్ని ప్రదర్శించడంతో ప్రధాన సూచీలు ఒక శాతానికి పైగా లాభాలను పక్కా చేసుకున్నాయి. దీంతో వరుసగా రెండో రోజు మార్కెట్లు లాభాలతో ముగిశాయి. ఇవాళ మార్కెట్ ముగిసే సమయానికి నిఫ్టీ 244.10 పాయింట్లు(1.02 శాతం)పెరిగి 24,206.90 వద్ద ముగియగా, సెన్సెక్స్ 827.57 పాయింట్లు(1.08 శాతం) పెరిగి 77,569.39 వద్ద స్థిరపడింది.

మార్కెట్ క్యాప్‌లో రూ.10 లక్షల కోట్ల రికార్డు రికవరీ

బుధవారం నాటి తీవ్రమైన అమ్మకాల ఒత్తిడి తర్వాత కుదేలైన మార్కెట్, గడచిన రెండు సెషన్లలో అద్భుతమైన రికవరీ సాధించింది. బుధవారం ట్రేడింగ్ ముగిసేసరికి రూ.471.80 లక్షల కోట్లుగా ఉన్న బీఎస్ఈ-లిస్టెడ్ కంపెనీల మొత్తం మార్కెట్ క్యాపిటలైజేషన్, శుక్రవారం నాటికి రూ. 481.79 లక్షల కోట్లకు చేరింది. దీనివల్ల కేవలం రెండు రోజుల్లోనే ఇన్వెస్టర్ల సంపదకు సుమారు రూ. 9.99 లక్షల కోట్లు తోడయ్యాయి. బుధవారం నాడు పోగొట్టుకున్న రూ. 8.40 లక్షల కోట్లను మార్కెట్ ఇప్పుడు పూర్తిగా అధిగమించి, అంతకుమించిన స్థాయికి చేరింది.

టాప్ గెయినర్స్ & లూజర్స్

రిలయన్స్ ఇండస్ట్రీస్, భారత్ ఎలక్ట్రానిక్స్ (బీఈఎల్), టెక్ మహీంద్రా, యాక్సిస్ బ్యాంక్, టాటా స్టీల్, ఇన్ఫోసిస్, బజాజ్ ఫైనాన్స్, అల్ట్రాటెక్ సిమెంట్, అదానీ పోర్ట్స్, లార్సెన్ & టూబ్రో, ఐసీఐసీఐ బ్యాంక్, హెచ్‌సీఎల్‌టెక్, స్టేట్ బ్యాంక్ ఆఫ్ ఇండియా మార్కెట్‌ను ముందుకు నడిపించాయి.

సన్ ఫార్మా, భారతీ ఎయిర్‌టెల్, ఎటర్నల్ వంటి షేర్లు నష్టాల్లో ముగియగా, ఐటీసీ (ITC) ఎటువంటి మార్పు లేకుండా ఫ్లాట్‌గా ముగిసింది.

ర్యాలీకి ముఖ్య కారణాలు:

తగ్గిన ముడి చమురు ధరలు, ఇండియా VIX: అంతర్జాతీయంగా ముడి చమురు ధరలు తగ్గడం, మార్కెట్ భయాన్ని సూచించే ఇండియా VIX (Volatility) పడిపోవడం మార్కెట్ సెంటిమెంట్‌ను పెంచింది.

సంస్థాగత పెట్టుబడులు: విదేశీ (FII), దేశీయ (DII) సంస్థాగత పెట్టుబడిదారులు అమ్మకాల మూడ్‌లో లేకపోవడం, రూపాయి విలువ పుంజుకోవడం ఇవాళ మార్కెట్‌కు పెద్ద ప్లస్ పాయింట్‌గా మారింది.

విస్తృత భాగస్వామ్యం: కేవలం ఫ్రంట్‌లైన్ షేర్లే కాకుండా, మిడ్‌క్యాప్, స్మాల్‌క్యాప్ స్టాక్స్ కూడా భారీగా లాభపడటం మార్కెట్ బలాన్ని నిరూపిస్తోంది.

ట్రేడింగ్ అప్‌డేట్, మార్కెట్ బ్రెడ్త్ (NSE)

శుక్రవారం ఎన్‌ఎస్‌ఈ (NSE)లో మార్కెట్ బ్రెడ్త్ పూర్తి సానుకూలంగా సాగింది. మొత్తం ట్రేడ్ అయిన 3,410 స్టాక్‌లలో.. 2,339 షేర్లు లాభపడగా, 976 షేర్లు నష్టపోయాయి. 95 షేర్లు యథాతథంగా ఉన్నాయి. ఇక, 52 వారాల గరిష్టాన్ని తాకినవి 110 షేర్లు కాగా, అప్పర్ సర్క్యూట్ తాకినవి 113 షేర్లు.

Also Read:

తులసి ఆకులు నమిలితే కిడ్నీ స్టోన్స్ కరిగిపోతాయా?

ఈ డ్రై ఫ్రూట్స్‌ను మితంగా తినాలి.. ఎక్కువగా తింటే డేంజర్