Stock Market: ఒత్తిడిలో ఐటీ రంగం.. సూచీలకు స్వల్ప నష్టాలు..

అంతర్జాతీయంగా ప్రతికూల సంకేతాలు, ఐటీ రంగం అమ్మకాల ఒత్తిడిని ఎదుర్కొంటుండడంతో దేశీయ సూచీలు ఒడిదుడుకుల్లో కొనసాగుతున్నాయి. అయితే ఆటో, మెటల్, రియాల్టీ రంగాలు రాణిస్తుండడం కొద్దిగా కలిసివస్తోంది. మరో వైపు బ్యాంకింగ్ రంగం కూడా లాభాలతో రాణిస్తోంది. డాలర్‌తో పోల్చుకుంటే రూపాయి మారకం విలువ పడిపోవడం కలవరపెడుతోంది. దీంతో సెన్సెక్స్, నిఫ్టీ స్వల్ప నష్టాల్లో కదలాడుతున్నాయి. (Indian stock market).

గత సెషన్ ముగింపు (85, 762)తో పోల్చుకుంటే సోమవారం ఉదయం వంద పాయింట్లకు పైగా నష్టంతో మొదలైన సెన్సెక్స్ ఆ తర్వాత కాసేపు లాభాల్లోకి వచ్చింది. అయితే ఆ వెంటనే నష్టాల్లోకి దిగజారింది. ప్రస్తుతం ఉదయం 10:10 గంటల సమయంలో సెన్సెక్స్ 30 పాయింట్ల స్వల్ప నష్టాలతో 85, 731 వద్ద కొనసాగుతోంది. మరో వైపు నిఫ్టీ కూడా సెన్సెక్స్ బాటలోనే కదలాడుతోంది. ప్రస్తుతం 6 పాయింట్ల స్వల్ప నష్టంతో 26, 358 వద్ద కదలాడుతోంది (stock market news today).

సెన్సెక్స్‌లో బంధన్ బ్యాంక్, లోధా డెవలపర్స్, అంబర్ ఎంటర్‌ప్రైజెస్, హిందుస్థాన్ ఏరోనాటిక్స్, డాబర్ ఇండియా మొదలైన షేర్లు లాభాల్లో ఉన్నాయి (share market news). ఆయిల్ ఇండియా, హెచ్‌సీఎల్ టెక్నాలజీస్, ఆర్బీఎల్ బ్యాంక్, ఇన్ఫో ఎడ్జ్, ఓఎన్‌జీసీ మొదలైన షేర్లు నష్టాల బాటలో సాగుతున్నాయి. నిఫ్టీ మిడ్ క్యాప్ ఇండెక్స్ 106 పాయింట్ల నష్టంతో ఉంది. బ్యాంక్ నిఫ్టీ 166 పాయింట్లు ఎగబాకింది. డాలర్‌తో పోల్చుకుంటే రూపాయి మారకం విలువ 90.23గా ఉంది.

ఇవి కూడా చదవండి..

వెనెజువెలాపై అమెరికా దాడి.. భారత ఆయిల్ కంపెనీలకు లాభమేనా..

మీ నగరంలో ఈ రోజు బంగారం, వెండి ధరలు ఎలా ఉన్నాయంటే..