ఆరు నెలల్లో క్రెడిట్ స్కోర్ పెంచుకోవచ్చా.. ఈ టిప్స్ పాటిస్తే మెరుగయ్యే అవకాశం..

ఇంటర్నెట్ డెస్క్: బ్యాంకు లోన్, క్రెడిట్ కార్డు లేదా ఇతర రుణాలు పొందడంలో క్రెడిట్ స్కోర్ కీలక పాత్ర పోషిస్తుంది. స్కోర్ తక్కువగా ఉంటే రుణం మంజూరు కావడం కష్టమవడమే కాదు.. కొన్ని సందర్భాల్లో అధిక వడ్డీ రేట్లు ఎదురయ్యే అవకాశం ఉంటుంది. అయితే కొన్ని ఆర్థిక అలవాట్లను మార్చుకోవడం ద్వారా క్రెడిట్ స్కోర్‌ను క్రమంగా మెరుగుపరచుకోవచ్చు. కొన్ని సందర్భాల్లో ఆరు నెలల్లోనే మార్పు కనిపించే అవకాశం ఉంటుంది (Credit score improvement).

1)ఈఎమ్‌ఐలు, క్రెడిట్ కార్డు బిల్లులు సమయానికి చెల్లించండి..

క్రెడిట్ స్కోర్‌ను మెరుగుపరచుకోవడానికి మొదటి అడుగు చెల్లింపులను ఆలస్యం చేయకపోవడం. వచ్చే ఆరు నెలల్లో మీ లోన్ ఈఎమ్‌ఐ లేదా క్రెడిట్ కార్డు బిల్లు ఒక్కటి కూడా ఆలస్యం కాకుండా చూసుకోవాలి. చెల్లింపు తేదీలు మర్చిపోతుంటే ఫోన్‌లో రిమైండర్లు పెట్టుకోవచ్చు. అవసరమైతే బ్యాంకు ఆటో-డెబిట్ సదుపాయాన్ని కూడా ఉపయోగించుకోవచ్చు. క్రమం తప్పకుండా సమయానికి చెల్లింపులు చేయడం ద్వారా మీ క్రెడిట్ ప్రొఫైల్ మెరుగుపడే అవకాశం ఉంటుంది (How to improve credit score).

2)క్రెడిట్ కార్డును ఎక్కువగా ఉపయోగించకండి..

క్రెడిట్ కార్డు లిమిట్ మొత్తాన్ని తరచుగా ఉపయోగించడం కూడా మీ క్రెడిట్ ప్రొఫైల్‌పై ప్రభావం చూపవచ్చు. ఉదాహరణకు మీ కార్డు లిమిట్ రూ.1 లక్ష అయితే, ప్రతి నెల దాదాపు మొత్తం లిమిట్‌ను ఉపయోగించడం మంచిది కాదు.

3)ఒకేసారి ఎక్కువ లోన్‌లకు అప్లై చేయకండి..

ఒక బ్యాంకు లోన్ దరఖాస్తును తిరస్కరించిన వెంటనే అనేక బ్యాంకుల్లో దరఖాస్తు చేయడం మంచిది కాదు. ప్రతి లోన్ లేదా క్రెడిట్ కార్డు దరఖాస్తులో రుణదాత మీ క్రెడిట్ రిపోర్టును పరిశీలించే అవకాశం ఉంటుంది. తక్కువ వ్యవధిలో అనేక క్రెడిట్ విచారణలు జరగడం మీ క్రెడిట్ ప్రొఫైల్‌పై ప్రతికూల ప్రభావం చూపవచ్చు. అందుకే ముందుగా గత దరఖాస్తు ఎందుకు తిరస్కరణకు గురైందో తెలుసుకుని, సమస్యను పరిష్కరించండి. ఆ తర్వాతే మళ్లీ అప్లై చేయడం మంచిది (Credit score tips).

4)మీ క్రెడిట్ రిపోర్టును చెక్ చేయండి..

కొన్నిసార్లు మీ తప్పు లేకుండానే క్రెడిట్ స్కోర్ తగ్గవచ్చు. క్రెడిట్ రిపోర్టులో తప్పు సమాచారం నమోదు కావడం ఇందుకు ఒక కారణం కావచ్చు. మీరు తీసుకోని లోన్ మీ పేరుతో ఉందా? చెల్లింపు పూర్తి చేసినా లోన్ ఇంకా యాక్టివ్‌గా చూపిస్తుందా? ఆలస్యమైన చెల్లింపు అని తప్పుగా నమోదు చేశారా? బకాయి మొత్తం తప్పుగా ఉందా? వంటి వివరాలను పరిశీలించాలి. ఏదైనా తప్పు కనిపిస్తే సంబంధిత బ్యాంకు లేదా ఆర్థిక సంస్థకు ఫిర్యాదు చేసి రికార్డును సరిచేయించుకోవాలి (Improve CIBIL score).

5)ఆరు నెలల్లో నిజంగా స్కోర్ మెరుగవుతుందా?

చెల్లింపులు ఆలస్యం కావడం, క్రెడిట్ కార్డు వినియోగం ఎక్కువగా ఉండటం లేదా క్రెడిట్ రిపోర్టులో తప్పు సమాచారం ఉండటం వల్ల స్కోర్ తగ్గినట్టైతే, ఆయా సమస్యలను సరిచేయడం ద్వారా ఆరు నెలల్లోనే మెరుగుదల కనిపించే అవకాశం ఉంది. అయితే చాలా కాలంగా ఉన్న బకాయిలు, గతంలో అనేకసార్లు చెల్లింపులు ఆలస్యం కావడం వంటి తీవ్రమైన సమస్యలు ఉంటే స్కోర్ మెరుగుపడటానికి ఆరు నెలల కంటే ఎక్కువ సమయం పట్టవచ్చు.

ఇవి కూడా చదవండి..

బ్యాంకులు, ఆసుపత్రులు, నైట్‌క్లబ్‌లలోనూ పెళ్లి రిజిస్ట్రేషన్.. చైనాలో ఎందుకిలా చేస్తున్నారంటే..

పెళ్లి రద్దు చేశారని దారుణం.. యువతి, ఆమె సోదరిపై యాసిడ్ దాడి..