జియో లిస్టింగ్ వేడుకలో అనంత్ అంబానీ భావోద్వేగ ప్రసంగం.. ‘వ్యాపారం ఒక పూజ.. జియో ప్రసాదం’

ముంబై, అక్టోబర్ 28: ఈ ఉదయం జరిగిన జియో ప్లాట్‌ఫామ్స్ ఐపీఓ లిస్టింగ్ కార్యక్రమంలో ముకేశ్ అంబానీ చిన్న కుమారుడు అనంత్ అంబానీ అత్యంత భావోద్వేగంతో ప్రసంగించారు. బీఎస్‌ఈ, ఎన్‌ఎస్‌ఈలలో స్టాక్ మార్కెట్ గంట మోగడాన్ని గుడిలో దేవుని గంట మోగడంతో ఆయన పోల్చారు.

'వ్యాపారం ఒక పూజ.. మార్కెట్ గంట గుడి గంట లాంటిది'

'ఈ రోజు నన్ను అత్యంత ప్రభావితం చేసిన ఒకే ఒక్క పదం 'కృతజ్ఞత' అని చెబుతూ అనంత్ అంబానీ తన ప్రసంగాన్ని ప్రారంభించారు.

'స్టాక్ ఎక్స్ఛేంజ్‌లో గంట మోగడం నాకు గుడిలో గంట మోగడం లాంటిది. ఎందుకంటే నాకు వ్యాపారం అనేది ఒక పూజ, ప్రతి పూజ ముగింపులో ప్రసాదం పంచుతారు. ఈ రోజు జియో అనే ప్రసాదాన్ని మేము భారత్‌లోని ప్రతి ఒక్కరితో పంచుకుంటున్నాం' అని వ్యాఖ్యానించారు.

తమ తల్లి నితా అంబానీ పిలిచే 'జియో మేరే లాల్', నానమ్మ కోకిలాబెన్ ఆశీర్వదించే 'జగ్ జగ్ జియో', స్నేహితుల 'జియో మేరే యార్' అనే పదాలను ఈ సందర్భంగా అనంత్ గుర్తుచేసుకున్నారు.

ధీరూభాయ్, ముకేశ్ అంబానీ వారసత్వం

తన తాతయ్య, రిలయన్స్ వ్యవస్థాపకుడు ధీరూభాయ్ అంబానీ సాధారణ భారతీయుడు కూడా గొప్ప కలలు కనగలడని నిరూపించారని అన్నారు.

తన తండ్రి ముకేశ్ అంబానీ 'భారత్ ఎప్పటికీ వెనుకబడి ఉండకూడదు' అనే ఆలోచనతో జియోను నిర్మించారని చెప్పారు.

'జియో ఆప్నే బనాయా': 'జియోను మీరే తయారుచేశారు. మీ కలలను నెరవేర్చడమే మా కల' అని ప్రజలను ఉద్దేశించి మాట్లాడారు.

తన సోదరుడు ఆకాశ్, సోదరి ఇషా అంబానీల గురించి చెబుతూ.. 'మేము ముగ్గురం వేర్వేరు శరీరాలమైనా ఒకే ఆత్మగా (Three bodies, One soul) ప్రజల ఆశయాలను నిలబెట్టడానికి పనిచేస్తాం' అని తెలిపారు. గ్రౌండ్ లెవెల్‌లో పనిచేసిన టెక్నీషియన్లు, ఇంజనీర్లు, స్టోర్ ఉద్యోగులకు ఈ విజయాన్ని అంకితం చేశారు.

ప్రధాని నరేంద్ర మోదీకి ధన్యవాదాలు

'డిజిటల్ ఇండియా' దార్శనికతతో జియో ఉనికికి స్పష్టమైన లక్ష్యాన్ని అందించి, నిరంతరం మార్గదర్శనం చేసినందుకు భారత ప్రధాని నరేంద్ర మోదీకి అనంత్ అంబానీ ప్రత్యేక ధన్యవాదాలు తెలిపారు. 'వికసిత్ భారత్' సాధనలో రిలయన్స్ ముందు వరుసలో ఉంటుందని ధీమా వ్యక్తం చేశారు.

జియో ప్లాట్‌ఫామ్స్ లిస్టింగ్ ముఖ్యాంశాలు

ప్రీమియం లిస్టింగ్: ప్రైస్ బ్యాండ్ అప్పర్ రేట్ రూ.1,119 ఉండగా, జియో షేర్లు 21.36శాతం ప్రీమియంతో రూ.1,358 వద్ద ఘనంగా లిస్ట్ అయ్యాయి.

మార్కెట్ క్యాప్: లిస్టింగ్ తర్వాత కంపెనీ మార్కెట్ విలువ సుమారు రూ.12.5 లక్షల కోట్లకు చేరింది. దీంతో తమ మాతృ సంస్థ రిలయన్స్ ఇండస్ట్రీస్ (RIL) తర్వాత భారతదేశంలోనే రెండో అత్యంత విలువైన కంపెనీగా జియో నిలిచిందని అనంత్ అన్నారు. రూ. 30,200 కోట్ల ఐపీవోకు 22 రెట్లకు పైగా బిడ్డింగ్ వచ్చిందని ఆయన వెల్లడించారు. కాగా, ప్రస్తుతం జియో ప్లాట్‌ఫామ్స్ 53 కోట్లకు పైగా (530 million) కస్టమర్లకు సేవలందిస్తోంది. (Anant Ambani Jio Listing Speech)

ఇవి కూడా చదవండి...

యానాంలో ఆర్నబ్ తుఫాను విలయం

కాకినాడ సముద్రంలో కొట్టుకుపోయిన కార్గో నౌక

Read Latest AP News And Telugu News