తిరుమల శ్రీవారికి 121 కిలోల బంగారు ఆభరణాల కానుక!
ABN , Publish Date - Nov 21 , 2026 | 05:22 PM
తిరుమల కలియుగ ప్రత్యక్ష దైవం శ్రీ వేంకటేశ్వర స్వామివారికి ఓ భక్తుడు కనీవినీ ఎరుగని రీతిలో భారీ కానుక సమర్పించేందుకు సిద్ధమయ్యారు. ఏకంగా 121 కిలోల బంగారంతో తయారు చేయించిన ఆభరణాలను శ్రీవారి పాదాల చెంత సమర్పించనున్నారు.
అమరావతి, నవంబరు 21: కలియుగ ప్రత్యక్ష దైవం తిరుమల శ్రీ వేంకటేశ్వర స్వామివారికి ఓ భక్తుడు అపూర్వమైన కానుకను సమర్పించేందుకు సిద్ధమయ్యారు. ఏడుకొండల వాడిపై తనకున్న అపారమైన భక్తిని చాటుకుంటూ ఏకంగా 121 కిలోల బంగారంతో తయారు చేయించిన ఆభరణాలను స్వామివారికి కానుకగా అందించనున్నారు. ఈ బంగారు ఆభరణాల విలువ సుమారు రూ.150 కోట్ల నుంచి రూ.160 కోట్ల వరకు ఉంటుందని అంచనా. మొత్తం 9 సెట్లుగా రూపొందించిన 45 రకాల బంగారు ఆభరణాలను స్వామివారి సేవలో సమర్పించేందుకు భక్తుడు ఏర్పాట్లు పూర్తి చేశారు.
ఈ భారీ కానుక సమర్పణకు సంబంధించి ఇప్పటికే తిరుమల తిరుపతి దేవస్థానం (టీటీడీ) అధికారులతో సదరు భక్తుడు సంప్రదింపులు పూర్తి చేసినట్లు సమాచారం. ఈ నెల 26వ తేదీన తిరుమలలోని శ్రీవారి సన్నిధిలో టీటీడీ అధికారులకు ఈ బంగారు ఆభరణాలను అధికారికంగా అందజేయనున్నారు. ఇందుకు సంబంధించి అవసరమైన ఏర్పాట్లు, ప్రక్రియలపై టీటీడీతో చర్చలు జరిగినట్లు తెలుస్తోంది. 121 కిలోల బంగారంతో తయారు చేసిన 45 ఆభరణాలు, 9 సెట్లుగా స్వామివారికి చేరనుండటంతో ఈ కానుకకు ప్రత్యేక ప్రాధాన్యత ఏర్పడింది.
ఈ వార్తలు కూడా చదవండి
రాహుల్ గాంధీకి కిరణ్ రిజిజు కౌంటర్.. కాంగ్రెస్కు నాలుగు సూటి ప్రశ్నలు..
ఆసక్తికరంగా కొలత్తూరు ఉపఎన్నిక.. ఎంకే స్టాలిన్ మళ్లీ పోటీ చేస్తారా..?