పోలవరం నిర్వాసితులకు భారీ ఊరట

• ఇళ్ల నిర్మాణ వ్యయం రూ.3.57 లక్షలకు పెంపు

• భూమి కొనుగోలుకు రూ.2 లక్షల సాయం

• ఓటీఎస్‌ కింద ఇక రూ.6.85 లక్షలు చెల్లింపు

• సీఎస్‌ సాయిప్రసాద్‌ ఉత్తర్వులు

అమరావతి, మే 6 (ఆంధ్రజ్యోతి): రాష్ట్ర జీవన రేఖ పోలవరం ప్రాజెక్టు కోసం భూములిచ్చి నిర్వాసితులైన కుటుంబాలకు రాష్ట్రప్రభుత్వం భారీ ఊరట కల్పించింది. సహాయ పునరావాస కాలనీల్లో ఇళ్లను సొంతంగా నిర్మించుకుంటున్నవారికి ఒక్కో గృహానికి ఇంతవరకు రూ.2.85 లక్షలు చెల్లిస్తున్నారు. ఇటీవల ఈ ధరను ఆర్‌ అండ్‌ ఆర్‌ కమిటీ పరిశీలించి నిర్మాణ వ్యయాన్ని రూ.3.57 లక్షలకు పెంచాలని నిర్ణయుంచింది. ఇందుకు రాష్ట్రమంత్రివర్గం ఆమోదం తెలుపడంతో ఈ మొత్తాన్ని సొంతంగా ఇల్లు కట్టుకుంటున్న నిర్వాసితులకు చెల్లించాలని ఆదేశిస్తూ జలవనరుల శాఖ బాధ్యతలు కూడా చూస్తున్న సీఎస్‌ సాయిప్రసాద్‌ బుధవారం ఉత్తర్వులు జారీచేశారు. అదేవిధంగా ఇప్పుడు వారికి భూమి కొనుగోలుకు రూ.లక్ష చెల్లిస్తున్నారు. ఈ మొత్తాన్ని కూడా రెట్టింపు చేస్తూ రెండు లక్షలు ఇవ్వాలని సీఎస్‌ తన ఉత్తర్వుల్లో పేర్కొన్నారు. ప్రస్తుతం నిర్వాసిత కుటుంబాలకు వన్‌ టైమ్‌ సెటిల్‌మెంట్‌ (ఓటీఎస్‌) కింద రూ.3.85 లక్షలు చెల్లిస్తున్నారు. ఈ మొత్తం చాలదని.. ప్రాజెక్టు నిర్మాణం కోసం తమ భూములు త్యాగం చేసినవారికి మరింత సహకారం ఇవ్వాలని సీఎం చంద్రబాబు భావించారు. ఈ నేపథ్యంలో ఓటీఎస్‌ కింద చెల్లింపును రూ.6.85 లక్షలకు పెంచేందుకు గత క్యాబినెట్‌ సమావేశం ఆమోదముద్ర వేసింది. ఇప్పుడు సీఎస్‌ ఈ మేరకు ఉత్తర్వులిచ్చారు. దశాబ్దాలుగా నివసిస్తున్న ప్రాంతాన్ని ప్రాజెక్టు కోసం ఇచ్చిన నిర్వాసితులు సంతోషంగా సురక్షిత ప్రాంతానికి తరలివెళ్లాలని ప్రభుత్వం భావిస్తోందని పోలవరం సహాయ, పునరావాస కమిషనర్‌ ప్రశాంతి ‘ఆంధ్రజ్యోతి’తో అన్నారు. పునరావాస కార్యక్రమాలకు మరో రూ.300 కోట్లు వ్యయం చేయనున్నట్లు తెలిపారు.