Telangana: అన్ని విధాలా అండగా ఉంటాం..: కుమార్ రాజా

యాదాద్రి భువనగిరి: బొమ్మలరామారం మండలంలోని రామలింగంపల్లి గ్రామ జిల్లా పరిషత్ హైస్కూల్ అభివృద్ధికి పర్వ్యూ గ్రూప్‌ చీఫ్ హ్యూమన్ రిసోర్సెస్ ఆఫీసర్ డాక్టర్ కుమార్ రాజా చిట్టూరి చేసిన విశేష కృషికిగానూ ఆయనకు గ్రామ ప్రజలు, పాఠశాల యాజమాన్యం ఘనంగా సన్మానం చేశారు. పర్వ్యూ గ్రూప్‌ ఇండియా, యునైటెడ్ కింగ్‌డమ్ ఆపరేషన్స్‌కు చీఫ్‌ హ్యూమన్‌ రిసోర్సెస్‌ ఆఫీసర్‌గా వ్యవహరిస్తున్న కుమార్ రాజా చిట్టూరి.. పాఠశాల విద్యార్థుల సంక్షేమం, విద్యా ప్రమాణాల మెరుగుదల కోసం చేపట్టిన అనేక అభివృద్ధి కార్యక్రమాలు గ్రామస్థుల ప్రశంసలు అందుకున్నాయి.

ఈ సందర్భంగా ఏర్పాటు చేసిన కార్యక్రమంలో పాఠశాల ప్రధానోపాధ్యాయురాలు సమ్యుక్త రాణి, గ్రామ పెద్దలు, మండల స్థాయి నాయకులు, గ్రామస్థులు పెద్ద సంఖ్యలో పాల్గొని కుమార్ రాజాను శాలువాతో సత్కరించి, జ్ఞాపికను అందజేశారు. ఈ కార్యక్రమంలో ఉపాధ్యాయులు, విద్యార్థులు, తల్లిదండ్రులు కూడా ఉత్సాహంగా పాల్గొన్నారు.

ఈ సందర్భంగా కుమార్ రాజా మాట్లాడుతూ.. ‘ఒక సంస్థగా మేము అభివృద్ధి చెందుతున్నప్పుడు, మన చుట్టూ ఉన్న సమాజాన్ని కూడా అభివృద్ధి పథంలోకి తీసుకెళ్లాల్సిన బాధ్యత మనపై ఉంది. విద్య మన భవిష్యత్‌కు బలమైన ఆధారం. ఈ గ్రామ పాఠశాల అభివృద్ధికి మా సంస్థ తరఫున సహాయం నిరంతరం కొనసాగుతుంది.’ అని స్పష్టం చేశారు. ఈ దిశగా తనను ప్రోత్సహిస్తున్న మేనేజింగ్ డైరెక్టర్లు కె.వి.ఎస్.ఎన్. శేషు కుమార్, కిరణ్ కుమార్ రెడ్డిలకు ఆయన ప్రత్యేక కృతజ్ఞతలు తెలియజేశారు.

గ్రామంలో విద్యారంగానికి సంబంధించి ఏవైనా సమస్యలు తలెత్తిన పక్షంలో, వాటిని సంస్థ మేనేజ్‌మెంట్ దృష్టికి తీసుకెళ్లి తగిన మద్దతు అందేలా చర్యలు తీసుకుంటానని ఆయన హామీ ఇచ్చారు. ‘ఇది ఒక్కరోజు కృషి కాదు – ఇది దీర్ఘకాలిక భాగస్వామ్యం’ అని ఆయన పేర్కొన్నారు. భవిష్యత్తులో కూడా పాఠశాలకు అవసరమైన సహాయం, వనరులను అందించేందుకు తాము సిద్ధంగా ఉన్నామని ఆయన తెలిపారు.

స్థానిక నాయకులు, సంఘ ప్రతినిధులు డా. కుమార్ రాజా సేవలను కొనియాడుతూ.. ఇది గ్రామ అభివృద్ధికి శుభ సూచికగా నిలుస్తుందని, ఇతర సంస్థలు కూడా ఇలాంటి సేవా కార్యక్రమాల్లో పాల్గొనాలని ఆకాంక్షించారు. ఈ సహాయం విద్యార్థులకు, భవిష్యత్ తరాలకు గొప్ప ప్రేరణగా నిలుస్తుందని వారు అభిప్రాయపడ్డారు.

కార్యక్రమం చివరలో విద్యార్థులు ప్రదర్శించిన సాంస్కృతిక కార్యక్రమాలు అందరినీ అలరించాయి. విద్యార్థుల కృతజ్ఞతలతో, గ్రామ ప్రజల సంతోషంతో సభ ఉత్సాహభరితంగా ముగిసింది. డా. కుమార్ రాజా చేసిన కృషికి నిదర్శనంగా ఈ సత్కార కార్యక్రమం నిలిచింది.