Telangana Congress: DCC అధ్యక్షుల నియామక ప్రక్రియ.. తెలంగాణకు ఏఐసీసీ పరిశీలకులు

హైదరాబాద్, అక్టోబర్ 11: కాంగ్రెస్ హై కమాండ్ తెలంగాణలో స్థానిక నాయకత్వాన్ని మరింత బలోపేతం చేసేందుకు నడుం బిగించింది. డిస్ట్రిక్ట్ కాంగ్రెస్ కమిటీల (డీసీసీ) అధ్యక్షుల నియామక ప్రక్రియను అమలు చేసేందుకు ఆల్ ఇండియా కాంగ్రెస్ కమిటీ (ఏఐసీసీ) 22 మంది సీనియర్ నేతలను పరిశీలకులుగా నియమించి, రాష్ట్రానికి పంపించింది.

ఈ రోజు (శనివారం) నుంచి ఈ పరిశీలకులు తెలంగాణలోని 35 జిల్లాలకు చేరుకుని, వారం రోజుల పాటు పర్యటించనున్నారు. ఈ ప్రక్రియ 'సంఘటన్ సృజన్ అభియాన్' పేరిట జరుగుతోంది. ఏఐసీసీ జనరల్ సెక్రటరీ కేసీ వేణుగోపాల్ ఇటీవల ప్రకటించినట్లుగా, మాజీ ముఖ్యమంత్రులు, కాంగ్రెస్ వర్కింగ్ కమిటీ (సీడబ్ల్యూసీ) సభ్యులు, మాజీ కేంద్ర మంత్రులు, మాజీ స్పీకర్లు వంటి ప్రముఖులు ఈ పరిశీలకుల జాబితాలో ఉన్నారు.

వీరిలో వి. నారాయణస్వామి, సీపీ జోషి, షక్తి సింహ్ గోహిల్, బెన్నీ బెహానన్, ఆంటో ఆంటోని, షోభా ఓజా, బీవీ శ్రీనివాస్, అజయ్ సింగ్, రిజ్వాన్ అర్షద్, సోఫియా ఫిర్దౌస్, అమీన్ పటేల్, ఎం. నారాయణ స్వామి మొదలైనవారు ఉన్నారు.

తెలంగాణ ప్రదేశ్ కాంగ్రెస్ కమిటీ (టీపీసీసీ) అధ్యక్షుడు మహేష్ కుమార్ గౌడ్ ప్రకటించినట్లుగా, ఈ పరిశీలకులు ప్రతి జిల్లాలో పార్టీ నాయకులు, కార్యకర్తలతో సమావేశాలు నిర్వహించి, డీసీసీ అధ్యక్షులుగా అనుకూలమైన అభ్యర్థుల జాబితాను సిద్ధం చేస్తారు. ప్రతి జిల్లాకు ఐదు లేదా ఆరుగురి పేర్లు సిఫారసు చేస్తూ, అక్టోబర్ 15 నాటికి హైకమాండ్‌కు నివేదిక సమర్పించనున్నారు.

ఈ నియామకాలు అక్టోబర్ చివరి వరకు పూర్తి చేసి, పార్టీని గ్రామస్థాయి వరకు బలపడేలా చేయాలనే లక్ష్యంతో ఈ చర్య తీసుకున్నారు.ఈ ప్రక్రియలో పారదర్శకత, కఠిన నియమాలు పాటించేందుకు ప్రత్యేక శ్రద్ధ పెట్టాలని ఏఐసీసీ అధ్యక్షుడు మల్లికార్జున్ ఖర్గే, మాజీ అధ్యక్షుడు రాహుల్ గాంధీలు పరిశీలకులతో ఇటీవల నిర్వహించిన సమావేశంలో సూచించారు.

తెలంగాణలో కాంగ్రెస్ ప్రభుత్వం అధికారంలో ఉన్న నేపథ్యంలో, ఈ నియామకాలు పార్టీని మరింత ఏకతాటిపై ఉంచి, రాబోయే ఎన్నికల్లో విజయానికి బలమైన పునాది వేస్తాయని పార్టీ వర్గాలు ఆశిస్తున్నాయి.

ఈ వార్తలు కూడా చదవండి..

స్వల్పంగా తగ్గిన బంగారం ధర.. బంగారం, వెండి ధరలు ఎలా ఉన్నాయంటే..

భద్రాద్రి రామయ్య సేవలో 225 జంటలు

Read Latest Telangana News and National News