SA vs NZ: ఫైనల్లో భారత్ ప్రత్యర్థి న్యూజిలాండ్.. సెమీస్‌లో దక్షిణాఫ్రికా ఓటమి..
ABN , Publish Date - Mar 05 , 2025 | 10:24 PM
ఛాంపియన్స్ ట్రోఫీ ఫైనల్ మ్యాచ్‌లో భారత్ ప్రత్యర్థి ఎవరనేది తేలిపోయింది. మరోసారి భారత్, న్యూజిలాండ్ జట్లు దుబాయ్ వేదికగా పోటీపడి టైటిల్ వేట సాగించబోతున్నాయి. లాహోర్ వేదికగా దక్షిణాఫ్రికాతో జరిగిన సెమీస్ పోరులో న్యూజిలాండ్ ఘన విజయం సాధించింది.
ఛాంపియన్స్ ట్రోఫీ (Champions Trophy) ఫైనల్ మ్యాచ్‌లో భారత్ ప్రత్యర్థి ఎవరనేది తేలిపోయింది. మరోసారి భారత్, న్యూజిలాండ్ జట్లు దుబాయ్ వేదికగా పోటీపడి టైటిల్ వేట సాగించబోతున్నాయి. లాహోర్ వేదికగా దక్షిణాఫ్రికాతో జరిగిన సెమీస్ పోరులో న్యూజిలాండ్ ఘన విజయం సాధించింది. టాస్ గెలిచి బ్యాటింగ్ ఎంచుకున్న న్యూజిలాండ్ భారీగా పరుగులు చేసింది. రచిన్ రవీంద్ర, కేన్ విలియమ్సన్ సెంచరీలతో కదం తొక్కడంతో న్యూజిలాండ్ నిర్ణీత 50 ఓవర్లలో ఆరు వికెట్లు కోల్పోయి 362 పరుగులు చేసింది. (SA vs NZ).
రచిన్ రవీంద్ర (101 బంతుల్లో 108), కేన్ విలియమ్సన్ (94 బంతుల్లో 102) బౌండరీలతో హోరెత్తించారు. పటిష్టమైన దక్షిణాఫ్రికా బౌలింగ్‌ను తుత్తునియలు చేశారు. వీరికి గ్లెన్ ఫిలిప్స్ (27 బంతుల్లో 49 నాటౌట్), డారెల్ మిచెల్ (37 బంతుల్లో 49) అద్భుత సహకారాన్ని అందించారు. దీంతో న్యూజిలాండ్ 362 పరుగులు చేసి న్యూజిలాండ్ ఎదుట భారీ లక్ష్యాన్ని ఉంచింది. దక్షిణాఫ్రికా బౌలర్లు అందరూ భారీగా పరుగులు సమర్పించుకున్నారు. ఎంగిడి మూడు, రబాడా రెండు వికెట్లు పడగొట్టారు. ముల్దర్ ఒక వికెట్ తీశాడు.
363 పరుగుల భారీ లక్ష్యంతో బ్యాటింగ్‌కు దిగిన దక్షిణాఫ్రికాకు ఛేజింగ్ చాలా కష్టంగా మారిపోయింది. సాధించాల్సిన రన్‌రేట్ ఎక్కువగా ఉండడంతో పాటు న్యూజిలాండ్ బౌలర్లు కట్టుదిట్టంగా బౌలింగ్ చేయడంతో దక్షిణాఫ్రికా బ్యాటర్లు ఆరంభం నుంచే ఒత్తిడికి లొంగిపోయారు. డేవిడ్ మిల్లర్ (100 నాటౌట్) పోరాటం వృథా అయిపోయింది. టెంబా బవుమా (56), వాన్‌డెర్ డసెన్ (69) అర్ధ శతకాలు సాధించినా వేగంగా పరుగులు చేయలేకపోయారు. చివరకు దక్షిణాఫ్రికా నిర్ణీత 50 ఓవర్లలో 9 వికెట్లు కోల్పోయి 312 పరుగులు మాత్రమే చేసింది. న్యూజిలాండ్ బౌలర్లలో మిచెల్ శాంట్నర్ మూడు వికెట్లు పడగొట్టాడు. మ్యాట్ హెన్రీ, గ్లెన్ ఫిలిప్స్ రెండేసి వికెట్లు తీశారు. రచిన్ రవీంద్ర, బ్రేస్‌వెల్ ఒక్కో వికెట్ తీశారు.
మరిన్ని క్రీడా వార్తలు కోసం క్లిక్ చేయండి..
