Ram Mohan: అహ్మదాబాద్‌లో విమాన ప్రమాద ఘటన స్థలాన్ని పరిశీలించిన కేంద్రమంత్రి రామ్మోహన్‌

అహ్మదాబాద్‌లో గురువారం(జూన్12) ఘోర విమాన ప్రమాదం జరిగింది. అహ్మదాబాద్‌లోని సర్దార్‌ వల్లభాయ్‌ పటేల్‌ అంతర్జాతీయ విమానాశ్రయం నుంచి లండన్‌లోని గాట్విక్‌కు బయలుదేరిన ఎయిరిండియా బోయింగ్‌ 787-8 డ్రీమ్‌లైనర్‌ విమానం(ఏఐ-171) కూలిపోయిన ఘటనలో 290మంది దుర్మరణ పాలయ్యారు. టేకాఫ్‌ సమయంలో సీటు బెల్టులు పెట్టుకున్న ప్రయాణికుల మృతదేహాలు.. భారీ ప్రమాదంతో కాలిపోయి, చెల్లా చెదురుగా పడిపోయాయి. ఈ విమాన ప్రమాద ఘటన తెలిసిన వెంటనే గన్నవరం నుంచి ప్రత్యేక విమానంలో కేంద్ర పౌరవిమానయాన మంత్రి రామ్మోహన్ నాయుడు అహ్మదాబాద్ చేరుకున్నారు. అనంతరం విమాన ప్రమాద ఘటన చోటు చేసుకున్న ప్రదేశానికి చేరుకుని పరిశీలించారు. ఈ ఘటన తీరును ఉన్నతాధికారులను అడిగి రామ్మోహన్ తెలుసుకున్నారు.