A Ponmudy: తమిళనాడు మంత్రి పొన్ముడిపై మండిపడ్డ కోర్టు.. కేసు నమోదుకు ఆదేశం

Tamil Nadu minister A Ponmudy: మహిళలు, మతపరమైన వర్గాలకు వ్యతిరేకంగా అవమానకరమైన, ద్వేషపూరిత ప్రసంగాలు చేశారనే ఆరోపణలపై తమిళనాడు మంత్రి ఎ పొన్ముడిపై కేసు నమోదు చేయాలని మద్రాస్ హైకోర్టు ఈరోజు పోలీసులను ఆదేశించింది. "చట్టం అందరికీ వర్తిస్తుంది. ప్రభుత్వం ఇతరుల ద్వేషపూరిత ప్రసంగాలను తీవ్రంగా పరిగణించినప్పుడు, మంత్రుల ద్వేషపూరిత ప్రసంగాలను కూడా తీవ్రంగా పరిగణించాలి" అని జస్టిస్ ఆనంద్ వెంకటేష్ అన్నారు. రాష్ట్ర అటవీ మంత్రిపై ప్రథమ సమాచార నివేదిక (FIR) దాఖలు చేయాలని పోలీసులను ఆదేశించారు.

ఇటీవల తమిళనాడులో నిర్వహించిన ఒక బహిరంగ సభలో సెక్స్ వర్కర్స్ గురించి మాట్లాడిన సందర్భంలో చేసిన శైవ-వైష్ణవ వ్యాఖ్యలతో తమిళనాడు అటవీ మంత్రి పొన్ముడి వివాదాన్ని సృష్టించారు. ఇది ఆయన సొంత పార్టీ ఎంపీ కనిమొళితో సహా అనేక మంది విమర్శలను ఎదుర్కొంది. డీఎంకే అధ్యక్షుడు, ముఖ్యమంత్రి ఎంకే స్టాలిన్ ఆయనను పార్టీ డిప్యూటీ జనరల్ సెక్రటరీ పదవి నుండి తొలగించారు. అయితే పొన్ముడి తరువాత తన "అనుచిత వ్యాఖ్యలకు" క్షమాపణలు చెప్పారు.

అయితే, మంత్రి పొన్ముడి విషయాన్ని సుమోటో(స్వయంగా) స్వీకరించిన మద్రాస్ హైకోర్టు, తదుపరి విచారణ కోసం ఏప్రిల్ 23కి కేసును వాయిదా వేసింది. పొన్ముడి వ్యవహారంపై అటు, తమిళనాడు ప్రతిపక్ష పార్టీ AIADMK మహిళా కార్యకర్తలు పెద్ద ఎత్తున నిరసనలు చేసిన సంగతి తెలిసిందే. AIADMK మహిళా విభాగం నాయకురాలు గాయత్రి రఘురామ్ మాట్లాడుతూ, మంత్రి పొన్ముడి ఇలాంటి మాటలు పదే పదే చెబుతున్నారని..ఆయనను మంత్రి పదవి నుండి తొలగించాలని డిమాండ్ చేశారు. "... ఆయనకు క్షమాపణ చెప్పడం కూడా అలవాటే. ఇది DMK DNAలోనే ఉంది. అమ్మ(జయలలిత) ముఖ్యమంత్రి అయినప్పుడు వారు ఆమెతో ఎలా వ్యవహరించారో మనం చూశాం. సీఎం స్టాలిన్.. పొన్ముడిని ఆ పదవి నుండి తొలగించారు, కానీ అది కంటితుడుపు చర్య. వారు ఎటువంటి చర్య తీసుకోలేదు. ఆయనను మంత్రి పదవి నుండి తొలగించాలి," అని శ్రీమతి రఘురామ్ మాజీ ముఖ్యమంత్రి J జయలలితను గుర్తు చేస్తూ వ్యాఖ్యలు చేశారు. జయలలితను ఆమె మద్దతుదారులంతా "అమ్మ" అని పిలిచేవారన్నది అందరికీ తెలిసిందే.

ఇలా ఉండగా, శనివారం పొన్ముడి తాను "అనుచిత పదాలు" ఉపయోగించానని అంగీకరించారు. "తంతై పెరియార్ ద్రవిడర్ కజగం నిర్వహించిన కార్యక్రమంలో నేను మాట్లాడేటప్పుడు అనుచితమైన పదాలకు నేను హృదయపూర్వకంగా క్షమాపణలు కోరుతున్నాను. నేను చేసిన అనుచిత వ్యాఖ్యలకు నేను వెంటనే తీవ్ర విచారం వ్యక్తం చేశాను. చాలా కాలంగా ప్రజా జీవితంలో ఉన్న వ్యక్తిగా, ఈ తీరులో లోపానికి నేను తీవ్రంగా చింతిస్తున్నాను" అని పొన్ముడి అన్నారు. "నా ప్రసంగం చాలా మందికి బాధ కలిగించిందని, వారికి ఇబ్బందికరమైన పరిస్థితిని సృష్టించిందని నేను చింతిస్తున్నాను. నా మాటల వల్ల బాధపడ్డ ప్రతి ఒక్కరికీ నేను మరోసారి హృదయపూర్వకంగా క్షమాపణలు కోరుతున్నాను" అని పొన్ముడి చెప్పుకొచ్చారు. అయితే, కోర్టు పొన్ముడి వ్యాఖ్యల్ని చాలా తీవ్రంగా పరిగణించి కేసు నమోదుకు పోలీస్‌లను ఆదేశించింది. అటు, పొన్ముడి వ్యవహార శైలిపై సోషల్ మీడియాలోనూ తీవ్ర వ్యతిరేకతలు వ్యక్తమవుతున్నాయి. పొన్ముడితోపాటు, అటు డీఎంకే పార్టీని సైతం జనం దుమ్మెత్తిపోస్తున్నారు.

Also Read:

అలర్ట్! ఆఫీసుల్లో ఉద్యోగులు ఈ 8 మిస్టేక్స్ చేస్తే

భారత్-చైనా కొత్త ఒప్పందం..కైలాష్ యాత్రకు

కాసేపట్లో ఈ ప్రాంతాల్లో భారీ వర్షం..

For More Telangana News and Telugu News..