Pediatric Cardiology: ‘పుట్టుకతో వచ్చే గుండె జబ్బులు ప్రాణాంతకం కాదు’

సమయానికి ముందే కేవలం 1.3 కిలోల బరువుతో పుట్టిన ఒక బిడ్డ.. ఆసుపత్రిలోని NICUలో ఊపిరి కోసం పోరాడుతోంది. మరో బిడ్డ, పుట్టిన రెండు గంటలకే తల్లి ఒడిలో చేరకుండానే నీలి రంగులోకి మారిపోయింది. ఇంకొక చిన్నారి పాకడం కూడా నేర్చుకోకముందే గుండె ఆగిపోయి ఇంట్లోనే మృత్యువాతపడింది. చాలా కుటుంబాలకు ఇలాంటి సంఘటనలు దుఃఖాన్ని మిగిల్చేవే. కానీ ఇలాంటి ఘటనలు.. పీడియాట్రిక్ కార్డియాక్ వైద్యుల చేతుల్లో.. అవి జీవనం, పోరాటం, ఆశకు సంబంధించిన కథలనే చెప్పాలి. పిల్లలో గుండె సంబంధిత వ్యాధుల గురించి చెన్నై అపోలో హాస్పిటల్ పీడియాట్రిక్ కార్డియాక్ సర్జన్ డాక్టర్ నెవిల్ సోలోమన్ కీలక వివరాలు తెలిపారు. అసలు చిన్నారుల్లో గుండెకు సంబంధించి ఎలాంటి వ్యాధులు వస్తాయి.. వీటి నుంచి ప్రాణాలతో బయటపడేందుకు మనం ఎలాంటి చర్యలు తీసుకోవాలి.. గుండె సంబంధిత సమస్యలకు ఎలాంటి చికిత్స, శస్త్ర చికిత్స అందిస్తారనేది డాక్టర్ నెవిల్ సోలోమన్ తెలిపిన వివరాలను ఈ కథనంలో తెలుసుకుందాం..

భారత్‌లో పుట్టుకతో వచ్చే గుండె జబ్బుల (CHD) నిశ్శబ్ద భారం..

ప్రతి సంవత్సరం.. భారతదేశంలో 2.5 నుండి 3 లక్షల మంది పిల్లలు పుట్టుకతోనే గుండె జబ్బుతో (CHD) జన్మిస్తున్నారు. అంటే గుండెకు పుట్టుకతోనే ఉన్న ఒక నిర్మాణ సమస్య. ఇందులో గుండెలో రంధ్రం ఉండవచ్చు, రక్తనాళాలు సరైన విధంగా కలిసి ఉండకపోవచ్చు, లేదా వాల్వ్‌లు సరిగా ఏర్పడకపోవచ్చు. చికిత్స లేకపోతే, ఈ పిల్లలలో దాదాపు సగం మంది మొదటి పుట్టినరోజు వరకూ బతకలేరు. గ్రామీణ భారతదేశంలో ప్రత్యేక పీడియాట్రిక్ కార్డియాలజీ సేవలు తక్కువగా ఉన్నందున ఈ సమస్య ఇంకా ఎక్కువగా ఉంది.

కానీ ఇప్పుడు పరిస్థితులు మారుతున్నాయి. మెరుగైన ప్రసవానికి ముందు (antenatal) స్కానింగ్ ద్వారా గర్భధారణ సమయంలోనే ఈ కేసులను ఎక్కువగా కనుక్కోగలుగుతున్నారు. భారత ప్రభుత్వ చొరవ ద్వారా రాష్ట్రీయ బాల్ స్వస్థ్య కార్యక్రమం (RBSK) వంటి పథకాలు నవజాత శిశువులు, పాఠశాలకు వెళ్లే పిల్లల స్క్రీనింగ్‌ను విస్తృతంగా అందుబాటులోకి తెచ్చాయి. దీనివల్ల గతంలో గమనించకుండా పోయిన జబ్బులను ఇప్పుడు ముందుగానే గుర్తించగలుగుతున్నారు. దేశవ్యాప్తంగా కార్డియాలజిస్టులు చిన్న పట్టణాలు, గ్రామాలలో శిబిరాలు నిర్వహించి వ్యాధి నిర్ధారణ, ఫాలో అప్ సేవలను దగ్గరగా అందిస్తున్నారు. ఈ నిరంతర, వ్యవస్థాగత ప్రయత్నాలు మంచి ఫలితాలను ఇస్తున్నాయి. పదిహేనేళ్ల క్రితం, ఒకే స్క్రీనింగ్ క్యాంపులో చికిత్స చేయని CHDతో దాదాపు 500 మంది పిల్లలు ఉండేవారు. నేడు ఆ సంఖ్య ఒక శిబిరానికి 10కి పడిపోయింది. ఇది నిర్ధారణ కాని కేసుల సంఖ్య క్రమంగా తగ్గుతోందని సూచిస్తుంది.

మచ్చలు లేకుండా నయం చేయడం..

ప్రతి చిన్నారికి ఓపెన్ హార్ట్ సర్జరీ అవసరం లేదు. రక్తనాళంలో సన్నని గొట్టం ద్వారా చేసే కేథటర్ ఆధారిత చికిత్సలు సంరక్షణ తీరును మారుస్తున్నాయి. ఛాతీని తెరవకుండా, కేథటర్ ద్వారా పెర్క్యుటేనియస్ ఫాంటన్ విధానం (percutaneous Fontan procedure) ఇప్పుడు అందుబాటులోకి వచ్చింది. ఫాంటన్ ప్రక్రియ అనేది సాధారణంగా గుండెలో ఒకే పంపింగ్ చాంబర్‌తో పుట్టిన పిల్లల కోసం రూపొందించిన శస్త్రచికిత్స. ఇది ఆక్సిజన్ స్థాయిలను మెరుగుపరచడానికి, సిరల నుండి రక్తాన్ని నేరుగా ఊపిరితిత్తులకు మళ్లిస్తుంది.

జీవితాలను మార్చే వైద్య పురోగతి..

గత రెండు దశాబ్దాలలో, భారతదేశంలో పీడియాట్రిక్ కార్డియాక్ సంరక్షణ చాలా మారింది.

• కేథటర్ ఆధారిత చికిత్సలు ఇప్పుడు అనేక సంప్రదాయ శస్త్రచికిత్సల స్థానంలో వచ్చాయి, దీనివల్ల శిశువులు 24 గంటలలోపు ఇంటికి వెళ్లగలరు.

• సర్జన్లు ఇప్పుడు ఒకప్పుడు ఆపరేషన్ సాధ్యం కాని కేసులపై దృష్టి పెడుతున్నారు,. అద్భుతమైన ఫలితాలను సాధిస్తున్నారు.

• పుట్టుకతో గుండె జబ్బులతో బాధపడుతున్న పెద్దవారిలో, రోబోటిక్, కనిష్ట ఇన్‌వాసివ్ పద్ధతులు ఎక్కువగా ఉపయోగపడుతున్నాయి.

• పీడియాట్రిక్ ట్రాన్స్‌ప్లాంట్‌లు చాలా అరుదుగా ఉన్నప్పటికీ, ఇతర చికిత్సలు విఫలమైనప్పుడు అవి అందుబాటులో ఉన్నాయి.

ఆశతో నిండిన భవిష్యత్తు..

ఈ సందర్భంగా తల్లిదండ్రులకు డాక్టర్ నెవిల్ సోలోమన్ కీలక సందేశం ఇచ్చారు. ‘పుట్టుకతో వచ్చే గుండె జబ్బు ప్రాణాంతకం కాదు. ఆధునిక సాంకేతికత, నిపుణుల నైపుణ్యం, ప్రభుత్వ, ప్రైవేట్ ఆరోగ్య సంరక్షణ వ్యవస్థలు కలిసి పనిచేస్తే, 2 కిలోల కంటే తక్కువ బరువున్న చిన్న పిల్లలు కూడా క్లిష్టమైన గుండె శస్త్రచికిత్సలను అధిగమించి, అద్భుతమైన దీర్ఘకాలిక ఫలితాలతో జీవించగలరు. తల్లిదండ్రులారా, భయపడకండి. అప్పుడే పుట్టిన నవజాత శిశువైనా, అరుదైన, క్లిష్టమైన వ్యాధితో ఉన్న పిల్లలైనా వారికి జీవితంలో ఒక అవకాశాన్ని ఇవ్వగలం.’ అని చెప్పారు.