Elon Musk: శ్వేతసౌధంలో మస్క్‌-బెసెంట్‌ డిష్యుం డిష్యుం

ట్రిలియన్‌ డాలర్ల ఆదా ఏమైంది?

మస్క్‌ను నిలదీసిన అమెరికా ట్రెజరీ సెక్రటరీ బెసెంట్‌.. కోపంతో మస్క్‌ దాడి

తిరిగి కొట్టిన బెసెంట్‌..మస్క్‌కు గాయం

కొట్లాట వివరాలను వెల్లడించిన ట్రంప్‌ అనుచరుడు స్టీవ్‌

వాషింగ్టన్‌, జూన్‌ 8: అమెరికా అధ్యక్షుడు డొనాల్డ్‌ ట్రంప్‌; డోజ్‌ మాజీ అధిపతి ఎలాన్‌ మస్క్‌ మధ్య విభేదాలు పొడచూపిన నేపథ్యంలో శ్వేతసౌధంలో జరిగిన దిగ్ర్భాంతికర ఘటన ఒకటి వెలుగులోకి వచ్చింది. టెస్లా సీఈవో ఎలాన్‌ మస్క్‌, అమెరికా ట్రెజరీ సెక్రటరీ స్కాట్‌ బెసెంట్‌ పరస్పరం కొట్టుకున్న విషయం బయటకొచ్చింది. ఏప్రిల్‌లో అమెరికా అధ్యక్ష కార్యాలయంలో జరిగిన ఓ సమావేశంలో ఈ ఘటన జరిగినట్లు తెలిసింది. ట్రంప్‌ అనుచరుడు స్టీవ్‌ బ్యానన్‌ ఈ విషయాన్ని వెల్లడించినట్లు ‘వాషింగ్టన్‌ పోస్ట్‌’ కథనంలో పేర్కొంది. శ్వేతసౌధంలో జరిగిన సమావేశం అనంతరం మస్క్‌, బెసెంట్‌ నడుచుకుంటూ వస్తుండగా ఈ ఘటన జరిగినట్లు తెలిపింది. ‘‘నువ్వు ప్రభుత్వానికి ట్రిలియన్‌ డాలర్లు ఆదా చేస్తానని హామీ ఇచ్చావు. కానీ, ఇంత వరకు చేసిందేమీ లేదు. ఇంతకీ నువ్వేం చేస్తున్నట్లు? అని బెసెంట్‌.. మస్క్‌ను ప్రశ్నించారు. నువ్వో మోసగాడివి, పూర్తిగా మోసగాడివి అని ఆరోపించారు. ఆగ్రహంతో ఊగిపోయిన మస్క్‌ ఒక్కసారిగా బెసెంట్‌పైకి దూసుకెళ్లారు. రగ్బీ ఆటగాడిలా తన కుడి భుజంతో బెసెంట్‌ పక్కటెముకలో గుద్దారు. వెంటనే బెసెంట్‌ కూడా మస్క్‌ను తిరిగి కొట్టారు. వారిద్దరినీ విడిపించేందుకు అక్కడున్నవారంతా ప్రయత్నించారు. తర్వాత మస్క్‌ను పశ్చిమ మార్గం నుంచి బయటకు తీసుకెళ్లారు. ఈ ఘటన గురించి తెలుసుకున్న ట్రంప్‌.. ‘ఇది చాలా దారుణం’ అని వ్యాఖ్యానించారు’’ అని బ్యానన్‌ను ఉటంకిస్తూ వాషింగ్టన్‌ పోస్ట్‌ కథనంలో తెలిపింది. డోజ్‌ అధిపతిగా రాజీనామా చేసిన తర్వాత ట్రంప్‌తో కలిసి చివరిసారిగా విలేకరుల సమావేశంలో పాల్గొన్న సమయంలో మస్క్‌ కన్ను వాచి, నల్లగా మారింది. అయితే అది తన కుమారుడి వల్ల అయిన గాయమని మస్క్‌ పేర్కొనడం గమనార్హం. మస్క్‌-బెసెంట్‌ కొట్లాట విషయం బయటపడిన తర్వాత అందరూ అది శ్వేతసౌధంలో బెసెంట్‌ చేసిన గాయమేనని పేర్కొంటున్నారు.

ఈ వార్తలు కూడా చదవండి..

పట్టణ పేదరిక నిర్మూలనకు కృషి.. ఏపీ మెప్మాకు అవార్డుల పంట

ఏపీ ఈఏపీసెట్ ఫలితాలు విడుదల

For Telangana News And Telugu News