Viral Video: కరెంట్, బ్యాటరీ కాదు.. కిరోసిన్‌తో నడిచే ఫ్రిడ్జ్.. వందేళ్ల నాటి ఫ్రిడ్జ్ గురించి ఈ విషయాలు తెలుసా?

ప్రస్తుత ఆధునిక యుగంలో విద్యుత్ (Electricity) లేనిదే చాలా పనులు కావడం లేదు. మన ఇంట్లో ఉపయోగించే ఎన్నో గృహోపకరణాలు కరెంట్ లేకపోతే ఎందుకూ పనికి రావు. వందల ఏళ్ల క్రితం కరెంట్ లేకుండానే పని చేసిన కొన్ని వస్తువుల గురించి తెలుసా? వందేళ్ల క్రితం కరెంట్ లేకుండా కూడా పని చేసిన ఫ్రిడ్జ్‌ల (Fridge) గురించి మీకు తెలుసా? ప్రస్తుతం నెట్టింట హల్‌చల్ చేస్తున్న ఓ వీడియో సోషల్ మీడియా జనాలను ఆశ్చర్యపరుస్తోంది.

వైరల్ అవుతున్న ఆ వీడియోలో వందేళ్ల క్రితం నాటి ఫ్రిడ్జ్ ఉంది. అది కరెంట్‌తోనో, బ్యాటరీతోనే కాదు.. కిరోసిన్‌తో పని చేసేది (kerosene Fridge). ఆ ఫ్రిడ్జ్ అడుగు భాగంలో దాదాపు 10 లీటర్ల ఆయిల్ ట్యాంక్ కూడా ఉంది. హిమ్‌లక్స్ కంపెనీకి చెందిన ఈ రిఫ్రిజిరేటర్‌కు సంబంధించిన అనేక సాంకేతిక అంశాలను వీడియోలో చూపించారు. కిరోసిన్ ఉన్న ట్యాంక్ కింది భాగంలో ఉన్న దీపాన్ని వెలిగిస్తారు. ఆ మంటతో నీరు, సల్ఫ్యూరిక్ యాసిడ్‌ను మండిస్తే గ్యాస్ వెలువడుతుంది.

ఫ్రిడ్జ్ వెనుక భాగంలో అమర్చిన పైప్ ద్వారా ఆ గ్యాస్ ఫ్రిడ్జ్‌ లోపలికి ప్రవేశించి అందులోని పదార్థాలను చల్లగా ఉంచుతుంది. కూలింగ్ ఎక్కువ కావాలనుకుంటే మంట పెద్దది చేయాలి. కూలింగ్ తక్కువ సరిపోతుందనుకుంటే మంటను చిన్నది చేయాలి. వందల ఏళ్ల క్రితం మన దేశంలోని ధనికులు ఫ్రాన్స్, లండన్‌ నుంచి ఈ ఫ్రిడ్జ్‌లను దిగుమతి చేసుకుని వాడేవారు. అప్పటి ఫ్రిడ్జ్‌కు సంబంధించిన ఈ వీడియో ప్రస్తుతం సోషల్ మీడియాలో వైరల్ (Viral Video) అవుతోంది.