Punjab Woman: హద్దుమీరిన యువతి.. కారు బొనెట్‌పై కూర్చొని స్టంట్స్.. బుద్ధి చెప్పిన కాప్స్

లైక్స్ & ఫాలోవర్స్ కోసం సోషల్ మీడియా ఇన్స్‌ఫ్లుయెన్సర్లు పడే తంటాలు అన్నీ ఇన్నీ కావు. సాధారణ వీడియోలు పెద్దగా వైరల్ అవ్వవు కాబట్టి.. రొటీన్‌కి భిన్నంగా చేయాలని అనుకుంటారు. అయితే.. ఈ క్రమంలో కొందరు హద్దుమీరి ప్రవర్తిస్తుంటారు. భయంకరమైన స్టంట్స్ చేస్తుంటారు. ఇలా చేయడం చట్టవిరుద్ధమని, ప్రాణాలకు ప్రమాదమని తెలిసినా సరే.. ఉద్దేశపూర్వకంగానే స్టంట్ వీడియోలు చేస్తారు. తామేదో గొప్ప పనులు చేస్తున్నామన్నట్టుగా బిల్డప్పులకు పోతుంటారు. ఇప్పుడు ఓ యువతి కూడా అలాగే హద్దుమీరింది. కారు బొనెట్‌పై కూర్చొని, వీడియో షూట్ చేసింది. అది వైరలై పోలీసుల కంట పడటంతో.. వాళ్లు తగిన రీతిలో బుద్ధి చెప్పారు. ఆ వివరాల్లోకి వెళ్తే..

సోషల్ మీడియా ఇన్స్‌ఫ్లుయెన్సర్ అయిన గౌరీ విర్దీ (25).. ఇన్‌స్టాగ్రామ్‌లో రీసెంట్‌గా 1 మిలియన్ ఫాలోవర్లను సంపాదించుకుంది. ఈ సందర్భాన్ని సెలెబ్రేట్ చేసుకుంటూ.. ఒక వీడియో తీసింది. అయితే.. రొటీన్‌గా కాకుండా భిన్నంగా చేయాలని నిర్ణయించుకుంది. కదులుతున్న ‘థార్’ కారు బొనెట్‌పై కూర్చొని.. తాను 1 మిలియన్ ఫాలోవర్స్ సాధించానంటూ ఓవరాక్షన్ చేసింది. ఈ వీడియోని ఆ కారుకి ఎదురుగా వెళ్తున్న కారులో ఉన్న మరో వ్యక్తి షూట్ చేశాడు. దసుయకి సమీపంలో ఉన్న జలంధర్-జమ్ము నేషనల్ హైవేలో ఈ వీడియోని షూట్ చేశారు. ఈ వీడియోని గౌరీ ఇన ఇన్‌స్టాగ్రామ్‌లో పోస్ట్ చేయగానే.. వెంటనే వైరల్ అయ్యింది. అటు ఇటు చక్కర్లు కొడుతూ.. చివరికి పోలీసుల కంట పడింది.

మోటారు వెహికల్ చట్టం ప్రకారం.. కదులుతున్న కారుపై ఇలా స్టంట్స్ చేయడం నేరం. దీంతో.. పోలీసులు ఆ యువతి వీడియోపై చర్యలు తీసుకున్నారు. రిజిస్ట్రేషన్ నంబర్ ద్వారా ఆ థార్ ఓనర్‌ని కనుగొన్న పోలీసులు.. ఆ కారుని స్వాధీనం చేసుకొని, సీజ్ చేశారు. అలాగే.. ఇలాంటి దిక్కుమాలిన స్టంట్స్ మరోసారి చేయొద్దని ఆ యువతితో పాటు ఆ కారులో ఉన్న ఇతరులకు పోలీసులు స్ట్రాంగ్ వార్నింగ్ ఇచ్చారు. ఇంకోసారి ఇది రిపీట్ అయితే, కఠిన చర్యలు తప్పవని హెచ్చరించారు. ఇతర సోషల్ మీడియా ఇన్‌ఫ్లుయెన్సర్లకు ఇలాంటి ఆలోచనలేమైనా ఉంటే, వెంటనే మానుకోవడం బెటర్.