Holi 2023: హోలీ రంగులతో జాగ్రత్త.. కళ్లు సేఫ్‌గా ఉండాలంటే..
ABN , First Publish Date - 2023-03-06T23:04:19+05:30 IST
హోలీ రోజున రంగులు పూసి ఏం అనుకోకండేం ఇది హోలీ పండుగ అనేసి వెళిపోతాం కానీ..,
ముందుగా ఆంధ్రజ్యోతి వెబ్ వీక్షకులందరికీ రంగుల రంగేలీ హోలీ పండుగ శుభాకాంక్షలు. రంగుల పండుగ హోలీ రోజున ప్రతి ఒక్కరూ చాలా రకాల రంగులను ఇంటికి తీసుకురావడం, ఇంటిని అలంకరించడం, సాంప్రదాయ హోలీ స్వీట్లు, స్నాక్స్ సిద్ధం చేయడం, బంధువులను, స్నేహితులను ఇంటికి ఆహ్వానించడం దీనితో పండగ వాతావరణం వచ్చేసినట్టే..అయితే ఈ పండుగలో మరీ ముఖ్యంగా ఆరోగ్యం, చర్మ సంరక్షణ, అందంపై శ్రద్ధ వహించడం మర్చిపోకూడదు. హోలీ రోజున రంగులు పూసి ఏం అనుకోకండేం ఇది హోలీ పండుగ అనేసి వెళిపోతాం కానీ.., రంగులు కళ్ళలోకి వస్తే కొన్నిసార్లు సమస్యాత్మకంగా ఉంటుంది. హోలీ సందర్భంగా, అసలు సరదాని నాశనం చేయకుండా రంగులు కళ్లను సురక్షితంగా ఉంచడానికి ఇక్కడ కొన్ని సూచనలున్నాయి.
1. విషపూరిత రసాయన రంగులను ఉపయోగించడం మానుకోవాలి.
మార్కెట్‌లో విక్రయిస్తున్న హోలీ రంగులలో చాలా వరకు పాదరసం, ఆస్బెస్టాస్, సిలికా, మైకా, సీసం వంటి ప్రమాదకర రసాయనాలు ఉండవచ్చు. ఇవి మానవ చర్మం, కళ్ళకు చాలా విషపూరితమైనవి. కళ్ళతో ఈ రసాయనాల ప్రతిచర్య చికాకు, ఎరుపు, అలెర్జీల వంటి లక్షణాలకు దారి తీస్తుంది. కొన్నిసార్లు, కంటికి తీవ్రమైన రసాయన ఘాటు తగిలి కూడా శాశ్వత దృష్టిని కోల్పోవచ్చు. ఈ రంగులకు బదులుగా పసుపు, వేప, గంధం, పువ్వులు మొదలైన సహజ పదార్ధాలతో తయారు చేసిన సాంప్రదాయ సహజ రంగులను ఉపయోగించడం మంచిది.
2. కొబ్బరి నూనెను కళ్ల చుట్టూ రాసుకోవాలి..
రంగులతో ఆడుకోవడానికి బయటికి వెళ్లే ముందు ముఖంపై ముఖ్యంగా కళ్ళ చుట్టూ ఫేస్ క్రీమ్ లేదా కొబ్బరి నూనె పూయడం మంచిది. రంగు కళ్ళలోకి ప్రవేశించకుండా నిరోధించడానికి ఈ ట్రిక్ ఉపయోగపడుతుంది. ఇలా రంగులను వదిలించుకోవడాన్ని సులభం అవుతుంది. ఇలా చేయడం ద్వారా చర్మం సున్నితమైన భాగాలకి రంగులు అంటుకోకుండా నిరోధించవచ్చు.
3. కళ్ళు రుద్దడం మానుకోండి.
హోలీ రంగులలో తడిసినప్పుడు ముఖం, కళ్లను తాకడం మానుకోవాలి. చేతులు మురికిగా ఉన్నప్పుడు, చేతుల్లోని రంగు కళ్ళకు వ్యాపిస్తుంది. ఇది ఇన్ఫెక్షన్లకు కారణం కావచ్చు. ఒకవేళ, హోలీ రంగు కళ్లలోకి ప్రవేశిస్తే, రుద్దకండి. కొన్నిసార్లు, మురికి చేతులతో కళ్లను రుద్దడం వల్ల కార్నియల్ రాపిడి లేదా కార్నియాపై గీతలు పడవచ్చు. ఇది కంటి ఇన్ఫెక్షన్లు కూడా కారణమవుతుంది.
4. కళ్లను లూబ్రికేట్ చేయడానికి కంటి చుక్కలను ఉపయోగించండి.
హోలీ వేడుక ముగిసిన తర్వాత, చల్లటి నీటితో కళ్లను పూర్తిగా శుభ్రం చేసిన తర్వాత, సూచించిన కంటి చుక్కలతో కళ్ళలో వేయాలి. ఈ చిట్కాలను పాటించడం వల్ల శాశ్వత కంటి సమస్యల నుండి మిమ్మల్ని రక్షించుకోవచ్చు.
5. నీళ్లతో కళ్లను కడగాలి.
హోలీ రంగు కళ్లలోకి పడితే, కళ్లలోని రంగు పోవాలంటే, చల్లని శుభ్రమైన నీటితో కళ్లను బాగా కడుక్కోవాలి. ఎక్కువ సేపు కళ్లను నీళ్లతో కడుక్కోవడం వల్ల కళ్లకు ఉపశమనం కలుగుతుంది. అయినా సమస్య తీవ్రంగా ఉంటే వెంటనే కంటి వైద్యులను సంప్రదించాలి.
