The Kerala Story: ఓ వైపు వివాదాలు... మరోవైపు రికార్డ్ కలెక్షన్లు

కోల్‌కతా: కేరళ అమ్మాయిలను ఇస్లాంలోకి మార్చి సిరియాలో ఐసిస్ ఉగ్రవాద గ్రూపుల్లో చేర్పించే ఇతివృత్తంతో రూపొందించిన కేరళ స్టోరీని(The Kerala Story) తమ రాష్ట్రంలో నిషేధిస్తున్నామని పశ్చిమబెంగాల్ ముఖ్యమంత్రి మమతా బెనర్జీ (West Bengal CM Mamata Banerjee) చెప్పారు. శాంతి భద్రతలకు విఘాతం కలిగించే అవకాశముందని మమత ఆందోళన వ్యక్తం చేశారు. అయితే మమత నిర్ణయంపై కోర్టుకు వెళ్తామని నిర్మాత విపుల్ అమృత్‌లాల్ షా (Vipul Amrutlal Shah) తెలిపారు. నిజమైన ఘటనల ఆధారంగా సినిమా తీశామని ఆయన చెప్పారు. అదే సమయంలో తమిళనాడులో(Tamil Nadu) సినిమాను బ్యాన్ చేయాంటూ ఎన్‌టీకే(NTK) పార్టీ అధినేత సీమన్ నేతృత్వంలో ఆ పార్టీ కార్యకర్తలు ఆందోళనలు చేస్తూ సినిమాను అడ్డుకోవడాన్ని విపుల్ షా తప్పుబట్టారు. ఒక్క వ్యక్తి బెదిరిస్తే సినిమా ప్రదర్శనను ఆపివేస్తారా అని తమిళనాడు, పుదుచ్చేరి ప్రభుత్వాలను ఆయన ప్రశ్నించారు. న్యాయస్థానాలు కూడా సినిమాను నిషేధించలేదని ఆయన గుర్తు చేశారు.

మరో వైపు ది కేరళ స్టోరీ సినిమా రికార్డ్ కలెక్షన్లు సాధిస్తోందని బాలీవుడ్ ఫిల్మ్ క్రిటిక్ తరణ్ ఆదర్శ్ (taran adarsh) ట్వీట్ చేశారు. విడుదలైన మూడు రోజుల్లోనే 35 కోట్ల రూపాయలకు పైగా కలెక్షన్లు ఇప్పటికే వచ్చాయన్నారు. అదా శర్మ తదితరులు నటించిన ఈ సినిమాకు సుదీప్తో సేన్ దర్శకత్వం వహించారు.