Former CM: మాజీసీఎం సంచలన వ్యాఖ్యలు.. ఇది సారాయి గ్యారెంటీ ప్రభుత్వం..

- మాజీ సీఎం బొమ్మై ఎద్దేవా

బెంగళూరు, (ఆంధ్రజ్యోతి): పంచాయతీలలోనూ మద్యం దుకాణాలను ప్రారంభించేందుకు అనుమతి ఇవ్వాలని ప్రభుత్వం తీసుకున్న నిర్ణయాన్ని బీజేపీ తప్పుబట్టింది. మాజీ ముఖ్యమంత్రి బసవరాజ్‌ బొమ్మై(Former Chief Minister Basavaraj Bommai) ఈమేరకు సోమవారం ట్వీట్‌ చేస్తూ ఇది సారాయి గ్యారెంటీ ప్రభుత్వమని ఎద్దేవా చేశారు. ప్రశాంతంగా పంచాయతీలలో మద్యం దుకాణాలను ప్రారంభించడం ద్వారా ప్రభుత్వం ఆదాయాన్ని సమకూర్చుకోవాలని తలపెట్టడం సరికాదన్నారు. మౌలిక సదుపాయాలపై దృష్టి సారించని సర్కార్‌ సారాయి దుకాణాలపై ఉత్సుకత చూపుతోందని విరుచుకుపడ్డారు. గ్యారెంటీ పేరిట మహిళలకు ప్రతినెల ఇస్తున్న రూ.2వేలను పురుషుల ద్వారా లాక్కునే ప్రయత్నాల్లో ఇది భాగమని విమర్శించారు. గ్రామ పంచాయతీలు ప్రశాంతంగా ఉండడం ప్రభుత్వానికి ఇష్టం లేదేమోనని వ్యాఖ్యా నించారు. ఈ ప్రతిపాదన విరమించుకోవాలని డిమాండ్‌ చేశారు.