California: కాలిఫోర్నియాలో అత్యయిక స్థితి ప్రకటించిన బైడెన్ ప్రభుత్వం

ఇంటర్నెట్ డెస్క్: మంచు తుఫానులతో అతలాకుతలమవుతున్న కాలిఫోర్నియా(California) రాష్ట్రాన్ని ఆదుకునేందుకు అమెరికా అధ్యక్షుడు జో బైడెన్(Joe Biden) శనివారం అత్యయిక స్థితి(Emergency) ప్రకటించారు. దీంతో కాలిఫోర్నియాకు కేంద్ర ప్రభుత్వ సాయం(Federal Funding) అందనుంది. డిసెంబర్ 26 నుంచి కాలిఫోర్నియా మంచు తుఫానులతో అల్లాడుతోంది. ప్రకృతి ఉత్పాతాల బారిన పడి ఇప్పటికే 19 మంది మరణించారు. వరుసగా సంభవిస్తున్న వరదలు, కొండ చరియలు విరిగి పడటం, రవాణాకు అంతరాయాలు, విద్యుత్ కోతలతో ప్రజలు అల్లాడుతున్నారు. ఈ నేపథ్యంలో ప్రజలను ఆదుకునేందుకు అమెరికా ఫెడరల్ ప్రభుత్వం రంగంలోకి దిగింది. అత్యయిక స్థితి ప్రకటనతో ఫెడరల్ ప్రభుత్వం బాధితులను అన్ని రకాలుగా ఆదుకునేందుకు సిద్ధమైంది. రాష్ట్రంలోని మెర్సిడ్, శాక్రమెంటో, సాంటాక్రజ్ ప్రాంతాల్లో బాధితులకు నేరుగా ఫెడరల్ ప్రభుత్వ సాయం అందనుంది.