Somu Veerraju : మీ టర్మ్ అయిపోయింది.. మిమ్మల్ని తొలగిస్తున్నామంటూ సోము వీర్రాజుకు జేపీ నడ్డా సడెన్ షాక్..

అమరావతి : ఏపీ బీజేపీ అధ్యక్షుడిగా సోము వీర్రాజును తొలగించారు. ఏమాత్రం చడీచప్పుడు లేకుండా ఇది జరిగిపోయింది. ఇటీవలి కాలంలో మన ఫోకస్ అంతా ఎంతసేపూ తెలంగాణ మీదే ఉంది. జరుగుతున్న పరిణామాలు కూడా అలాగే ఉన్నాయి. అధిష్టానం నుంచి బండి సంజయ్‌కు కాల్ రావడం.. ఆయన హుటాహుటిన నిన్న హస్తినకు బయలుదేరి వెళ్లడం చకచకా జరిగిపోయాయి. పైగా ఆయనను తెలంగాణ బీజేపీ చీఫ్ పదవి నుంచి తప్పించి దానిని కేంద్ర మంత్రికి కిషన్ రెడ్డికి కట్టబెడతారంటూ గత కొంతకాలంగా టాక్ నడుస్తోంది. ఈ క్రమంలోనే తెలంగాణ హాట్ టాపిక్‌గా మారింది. ఇప్పుడు సోము వీర్రాజు తొలగింపుతో ఏపీ చర్చనీయాంశంగా మారింది.

ఏపీ బీజేపీ అధ్యక్షుడిగా సోము వీర్రాజును తొలగిస్తున్నట్టు బీజేపీ జాతీయ అధ్యక్షుడు జేపీ నడ్డా స్వయంగా ఆయనకే ఫోన్ చేసి చెప్పి షాక్ ఇచ్చారు. కొద్దిసేపటి క్రితం సోము వీర్రాజుకు జేపీ నడ్డా ఫోన్‌ చేశారు. ‘ మీ టర్మ్‌ అయిపోయింది.. మిమ్మల్ని తప్పిస్తున్నాం.. రాజీనామా చేయాలి’ అని సూచించారు. బీజేపీ కార్యాలయంలో అల్లూరి సీతా రామరాజు జయంతి కార్యక్రమాన్ని సోము వీర్రాజు నిర్వహించిన కాసేపటికే ఈ షాకింగ్ న్యూస్ ఆయన వినాల్సి వచ్చింది. ఏపీలో ఇటీవలి కాలంలో ఆయనపై కొందరు బీజేపీ నేతలు ఆగ్రహంతో ఉన్నారు. అదీ చాలదన్నట్టు కన్నా లక్ష్మీనారాయణ పార్టీని వీడటానికి కూడా కారణం సోమూ వీర్రాజేనన్న టాక్ నడిచింది. ఈ క్రమంలోనే అధ్యక్షుడి మార్పు ఆవశ్యకమని అధిష్టానం భావించినట్టు తెలుస్తోంది. ఇక ఏపీ బీజేపీ అధ్యక్షుడి రేసులో సత్యకుమార్, సుజనా చౌదరి పేర్లు వినిపిస్తున్నాయి.