రైళ్ల రాకపోకల వేళల మార్పు

ప్రకటించిన ఈస్టుకోస్టు జోన అధికారులు

ఆమదాలవలస, డిసెంబరు 4:  కరోనా వైరస్‌ నేపథ్యంలో నిలిచిపోయిన రైళ్ల రాకపోకలు ప్రారంభమయ్యాయి. లాక్‌డౌన్‌ సడలింపు తర్వాత క్రమేణా రైళ్లు రాకపోకలను పునరుద్ధరిస్తున్నారు. ఈ నేపథ్యంలో ఈస్టుకోస్టు జోన అధికారులు  శ్రీకాకుళం రోడ్డు (ఆమదాలవలస) వచ్చే రైళ్ల రాకపోకల వేళల్లో మార్పు చేశారు. రైల్వేశాఖ రైళ్ల వేగం పెంచడం, రైలు ఇంజిన్లు, బోగీల నిర్వహణకు సమయం కేటాయించడంతో వేళల్లో మార్పులు చోటుచేసుకున్నట్లు తెలుస్తోంది. ఈ మార్పులు ఈనెల ఒకటో తేదీ నుంచి అమల్లోకి వచ్చినట్లు జోన అధికారులు ప్రకటించారు. 

- ముంబై నుంచిభువనేశ్వర్‌ వెళ్లే (01019)కోణార్క్‌ ఎక్స్‌ప్రెస్‌ రాత్రి 11.10 నిమిషాలకు రావల్సి ఉండగా, సాయంత్రం 5.51 నిమిషాలకు చేరుకుంటుంది.

- బెంగళూరు నుంచి భువనేశ్వర్‌ వెళ్లే (08464) ప్రశాంతి ఎక్స్‌ప్రెస్‌ మధ్యాహ్నం 3.32 నిమిషాలకు రావల్సి ఉండగా, ముందుగానే 1.33 నిమిషాలకు చేరుకుంటుంది.

-  యశ్వంత్‌పూర్‌ నుంచి హౌరావెళ్లే ఎక్స్‌ప్రెస్‌ (02874) సాయంత్రం 6.08 బదులు ఉదయం 7.03కు వస్తుంది. 

- హౌరా-యశ్వంత్‌పూర్‌ రైలు (02873) ఉదయం 8.13 నిమిషాలకు బదులు ఉదయం 10.12లకు వస్తుంది.

- హౌరా-సికింద్రాబాద్‌(02703) ఫలక్‌నామా రాత్రి ఏడు గంటలకు బదులు 8.15 నిమిషాలకు చేరుతుంది.

- సికింద్రాబాద్‌-హౌరా(02704)ఫలక్‌నామా ఉదయం 5.40 చేరుతుంది. 

- సికింద్రాబాద్‌- షాలిమార్‌(02774) వారాంతపు రైలు (మంగళవారం) రాత్రి 7.50 బదులు సాయంత్రం 5.23 వస్తుంది.

- సికింద్రాబాద్‌-గుహాటి (02513)ఆదివారం వీక్లీ రాత్రి 9.30 రావల్సి ఉండగా సాయంత్రం 6.31 వస్తుంది. వీటితో పాటు మరిన్ని రైళ్ల వేళలు మార్చారు.