Abn logo
Jul 27 2021 @ 15:06PM

టీవీ సీరియల్ ప్రోమోతో కొత్త కాంట్రవర్సీ.. ఇదేంటంటూ విమర్శలు.. ఇంతకీ ఆ ప్రోమోలో ఏముందంటే..

త్వరలో ప్రసారం కాబోతున్న తమిళ సీరియల్ `తెండ్రల్ వంతు ఎన్నై తోండుమ్` ప్రోమో సరికొత్త వివాదానికి తెరతీసింది. ఆదివారం విడుదలైన ఈ ప్రోమో మహిళలను, వారి హక్కులను కించపరిచేలా ఉందని తమిళనాట విమర్శలు వ్యక్తమవుతున్నాయి. తిరవళ్లూర్ ఎస్పీ వరుణ్ కుమార్ కూడా ఆ ప్రోమోపై అసహనం వ్యక్తం చేశారు. ఇంతకీ ఆ ప్రోమోలో ఏముందంటే.. 


ఆ సీరియల్ హీరోయిన్ అభినయ గుడికి వస్తుంది. ఆమె గుడిలో పూజ చేస్తుండగా.. హీరో ఆగ్రహంగా గుడిలోకి ప్రవేశిస్తాడు. తల్లిదండ్రులకు తెలియకుండా గుళ్లో పెళ్లి చేసుకున్న నూతన దంపతుల దగ్గరకు వచ్చి.. వధువు మెడలోని తాళి తెంపేందుకు ప్రయత్నిస్తాడు. ఆ సమయంలో అక్కడకు వచ్చిన హీరోయిన్.. హీరోను కొడుతుంది. గుడిలో దేవత ముందు కట్టిన తాళి పవిత్రత గురించి చెబుతుంది. దీంతో హీరోయిన్‌కు బుద్ధి చెప్పాలనే ఉద్దేశంతో హీరో అక్కడే దేవతా విగ్రహం మెడలో ఉన్న తాళి తీసి హీరోయిన్‌కు కట్టేస్తాడు. `దేవత ముందు తాళి కట్టేశాను.. నువ్వు నా భార్యవి అయిపోతావా?` అని అడుగుతాడు. హీరోను కన్నీటితో హీరోయిన్ అనుసరిస్తుండగా ప్రోమోను ముగించారు. 


ఆదివారం విడుదలైన ఈ ప్రోమో  తీవ్ర విమర్శలు ఎదుర్కొంటోంది. ఇండిపెండెంట్ జర్నలిస్ట్ కవితా మురళి ఈ ప్రోమోను సోషల్ మీడియాలో షేర్ చేసి `తమిళ సీరియల్స్ వెదజల్లుతున్న విషం` అని కామెంట్ చేశారు. ఈ పోస్ట్‌కు తిరవళ్లూర్ ఎస్పీ వరుణ్ కుమార్ స్పందిస్తూ.. మహిళలను వేధించడం అనేది చట్ట రీత్యా నేరమని, ప్రార్థనా స్థలాల్లో వారిపై దురుసుగా ప్రవర్తించడం మరింత నేరమని పేర్కొన్నారు. కాగా, సీరియల్స్, సినిమా రూపకర్తలు సామాజిక బాధ్యతను కలిగి ఉండాలని పేర్కొన్నారు. 


ప్రత్యేకంమరిన్ని...