జూ వెలుపల వింత ఆకారం.. వివరాలు తెలుసుకునేందుకు స్థానికుల సహాయం కోరిన సిబ్బంది!

అమెరికాలోని టెక్సాస్‌లో ఓ జంతు ప్రదర్శనశాల వెలుపల కనిపించిన వింత ఆకారం కలకలం రేపుతోంది. అమారిల్లో జంతు ప్రదర్శనశాల వద్ద ఏర్పాటు చేసిన సీసీటీవీ కెమెరాలో మే 21 రాత్రి 1:25కి ఈ వింత ఆకారానికి సంబంధించిన దృశ్యాలు రికార్డయ్యాయి. రెండు కాళ్లతో నడుస్తున్న ఆ ఆకారం తల జంతువును పోలి ఉంది. కెమెరాలో రికార్డయిన ఈ వింత జీవిని చూసి జూ సిబ్బంది ఆశ్చర్యపోయారు. 

ఇది కూడా చదవండి..

ఏనుగులు కూడా పగబడతాయా..? ఓ మహిళను చంపి.. వెతుక్కుంటూ ఊళ్లోకి వచ్చి మరీ ఆమె ఇంటిని కూల్చి..

వెంటనే ఆ ఫొటోను సోషల్ మీడియాలో పోస్టు చేశారు. లాటిన్ అమెరికాలో బాగా పాపులర్ అయిన చుపాకబ్రా (జంతువులపై దాడి చేసి వాటి రక్తం తాగే భయంకరమైన జీవి) లాంటిదా? అని అనుమానం వ్యక్తం చేశారు. ఈ విచిత్ర జీవిని గుర్తించడంలో సాయపడాలంటూ అధికారులు స్థానిక ప్రజలను కోరుతున్నారు. కాగా, ఈ ఫొటోపై సోషల్ మీడియాలో భిన్న స్పందనలు వచ్చాయి. మనిషే జంతువు వేషం వేసుకుని వచ్చి ఉంటాడని కొందరు అభిప్రాయపడ్డారు. మరికొందరు ఇది వింత జీవి అయ్యుంటుందేమోనని వ్యాఖ్యానించారు.