వ్యాక్సిన్ కోసం వచ్చిన స్పైడర్ మ్యాన్... కిటికీలో నుంచి టీకా!

పట్నా: కరోనా మహమ్మారి కారణంగా ప్రపంచం అతలాకుతలమైపోతోంది. కరోనా కట్టడికి అన్ని దేశాల్లోనూ వ్యాక్సినేషన్ ముమ్మరంగా జరుగుతోంది. ఈ నేపధ్యంలో బీహార్ లోని ఒక వ్యాక్సినేషన్‌ సెంటర్‌కు సంబంధించిన వీడియో వైరల్‌గా మారింది. ఈ వీడియోను బీహార్ విపక్ష నేత, లాలూ తనయుడు తేజ్ ప్రతాప్ యాదవ్ షేర్ చేశారు. 

బీహార్‌లోని ఆరోగ్య వ్యవస్థ పనితీరుపై, సీఎం నితీష్‌పై విమర్శలు గుప్పించారు. ఈ వీడియోలో... వ్యాక్సినేషన్ సెంటర్ వద్ద... రెండు గోడల మధ్య ఒక వ్యక్తి స్పైడర్ మ్యాన్ తరహాలో నిలుచుని, కిటికీలో నుంచి వ్యాక్సిన్ వేయించుకోవడం కనిపిస్తుంది. ఆరోగ్య కార్యకర్త కూడా ఆ ‘స్పైడర్ మ్యాన్’కు సహకరించడం విశేషం. ఈ వీడియోను తన ఫేస్‌బుక్‌లో షేర్‌చేసిన తేజ్ ప్రతాప్... ‘ఇకపై కరోనా వ్యాక్సిన్ తీసుకోవడం మరింత సులభం‘ అని రాశారు. ఈ వీడియో బీహార్‌లోని వైద్య వ్యవస్థ తీరుతెన్నులను చూపిస్తోంది. వ్యాక్సినేషన్ సెంటర్‌లో జనం ఎక్కువగా ఉండటంతో ఒక వ్యక్తి కిటికీలో నుంచి వ్యాక్సిన్ వేయించుకోవడం వీడియోలో కనిపిస్తుంది. ఈ వీడియోను చూసిన నెటిజన్లు వ్యాక్సినేషన్ కోసం స్పైడర్ మ్యాన్ వచ్చాడంటూ కామెంట్లు చేస్తున్నారు.