మంచి కథతో సినిమా తీస్తా!
ABN , First Publish Date - 2020-10-27T16:59:36+05:30 IST
దర్శకుడ్ని కావాలన్న కోరికతో సినీ పరిశ్రమలో అడుగుపెట్టా. ఒక సినిమాకు అసిస్టెంట్ డైరెక్టర్గా పనిచేశా. అనుకోకుండా వచ్చిన అవకాశాలతో...
అసిస్టెంట్ డైరెక్టర్గా సినీ రంగ ప్రవేశం
హాస్యంతో తగిన గుర్తింపు
50కిపైగా సినిమాల్లో నటించా
సినీ హాస్యనటుడు సత్య
కశింకోట(విశాఖపట్నం): దర్శకుడ్ని కావాలన్న కోరికతో సినీ పరిశ్రమలో అడుగుపెట్టా. ఒక సినిమాకు అసిస్టెంట్ డైరెక్టర్గా పనిచేశా. అనుకోకుండా వచ్చిన అవకాశాలతో హాస్య నటుడిగా సిర్థపడ్డానని సత్య (సత్యనారాయణ) చెప్పారు. ఓ ప్రైవేటు కార్యక్రమంలో పాల్గొనేందుకు సోమవారం కశింకోట వచ్చిన ఆయన ‘ఆంధ్రజ్యోతి’తో ముచ్చటించారు.
ప్రశ్న: సినీ రంగ ప్రవేశం ఎలా జరిగింది?
జవాబు: మాది తూర్పుగోదావరి జిల్లా అమలాపురం. నటనపై ఆసక్తితో ఈటీవీ జబర్దస్త్లో కొంతకాలం పనిచేశా. ఆ అనుభవంతో 2008లో పిల్ల జమీందార్ సినిమాకి అసిస్టెంట్ డైరెక్టరుగా పనిచేసే అవకాశం వచ్చింది. అలా సినీ ప్రయాణం మొదలయింది.
ప్రశ్న: ఇప్పటివరకు ఎన్ని సినిమాల్లో నటించారు? గుర్తింపు తెచ్చినవి ఏవి?
జవాబు: ఇప్పటివరకు 50కు పైగా తెలుగు సినిమాల్లో నటించా. స్వామిరారా, పిల్ల జమీందార్, ఛలో, కార్తీకేయ, మత్తు వదలరా, గద్దల కొండ గణేష్ (వాల్మీకి) సినిమాలు మంచిపేరు తెచ్చిపెట్టాయి.
ప్రశ్న: మీరు మెచ్చే ిహీరోలు, దర్శకులు?
జవాబు: శంకర్ దర్శకత్వం వహించే సినిమాలంటే ఇష్టం. తెలుగులో రాజమౌళి, పూరీ జగన్నాథ్, సుకుమార్ వంటి దర్శకులను ఇష్టపడతా. బాగా ఇష్టపడే హీరోలు రజనీకాంత్, చిరంజీవి.
ప్రశ్న: రాబోయే చిత్రాలు? మంచి అనుభూతి మిగిల్చిన సినిమా?
జవాబు: శర్వానంద్ హీరోగా నటిస్తున్న శ్రీకారం, రామ్ హీరోగా నటిస్తున్న రెడ్, గల్లా జయదేవ్ కుమారుడు అశోక్ హీరోగా తెరకెక్కనున్న సినిమాల్లో మంచి హాస్యాన్ని పండించే పాత్రలు వచ్చాయి. ఛలో సినిమాకి సైమా అవార్డు దక్కడం మరచిపోలేని అనుభూతి.
ప్రశ్న: ఎలాంటి పాత్రలు చేయాలనుకుంటున్నారు? బలమైన కోరిక ఏంటి?
జవాబు: అన్నిరకాల పాత్రలతో ప్రేక్షకులను మెప్పించాలన్నదే కోరిక. ఎప్పటికైనా సినిమా కోసం మంచి కథ రాసి సొంతంగా నిర్మించాలన్నది బలమైన కోరిక. ఇప్పటికే కథ రాయడం ప్రారంభించా.