జీ‘డీలా’!

తగ్గిన జీడిపిక్కల ధరలు

లబోదిబోమంటున్న రైతులు 

పలాస, మే 11: ఉద్దానం జీడి పిక్కపై కరోనా ప్రభావం పడుతోంది. సీజన్‌ ప్రారంభంలోనే 80 కిలోల జీడి పిక్కల బస్తా రూ.6,700 నుంచి రూ.7200 ధర పలకడంతో రైతులు తీవ్ర ఆవేదన వ్యక్తం చేస్తున్నారు. వరుసగా ఐదేళ్లపాటు తీవ్ర ప్రతికూల పరిస్థితుల్లో పంటలు రాలేదు. ఈ ఏడాది ఆశించిన స్థాయిలో దిగుబడి వచ్చినా ధర లేకపోవడంతో రైతులు నిరాశ చెందుతున్నారు. సాధారణంగా కొత్త పిక్కలు ప్రారంభంలో రేటు అధికంగా ఉంటుంది. కానీ ఈ ఏడాది ధర తగ్గిందని వాపోతున్నారు. జిల్లాలో 34వేల హెక్టార్లలో జీడి పిక్కలు పండిస్తున్నారు. ఎకరాకు సరాసరి నాలుగు బస్తాల వరకు దిగుబడి వస్తుంది. ఒక్కో ఎకరాకు రూ.12వేల నుంచి రూ.15వేల వరకు పెట్టుబడి అవుతుంది. ఈ నేపథ్యంలో ప్రస్తుత ధర చూస్తే.. కనీసం తమ పెట్టుబడి కూడా వచ్చే పరిస్థితి లేదని రైతులు పేర్కొంటున్నారు. ఇతర జిల్లాలకు చెందిన జీడి పిక్కలు రూ.6200కు మార్కెట్‌లో లభ్యమవుతున్నాయి. ప్రస్తుతం ఆ పిక్కలతో పాటు స్థానిక పిక్కలను రూ.500 ధర ఎక్కువ ఇచ్చి కొనుగోలు చేస్తున్నట్లు వ్యాపారులు చెబుతున్నారు. ఇదిలా ఉండగా పిక్కల ధర పడిపోగా.. పప్పు ధర మాత్రం రోజురోజుకు పెరుగుతుండడం విశేషం. ఈ ఏడాది 80 కిలోల జీడి పిక్కల బస్తాకు కనీసం రూ.16వేలు మద్దతు ధర చెల్లించాలని ఉద్దానం జీడి పిక్కల పోరాటకమిటీ ఇప్పటికే ప్రభుత్వానికి లేఖ ద్వారా తెలిపింది. అందులో సగం ధర కూడా ప్రస్తుతం లేకపోవడంతో సర్వత్రా ఆందోళన వ్యక్తమవుతోంది. ఈ వ్యవహారంపై సాధనకమిటీ ప్రతినిధులు వంకల మాధవరావు, మద్దిల రామారావు, బత్తిన హేమేశ్వరరావులు ‘ఆంధ్రజ్యోతి’తో మాట్లాడుతూ ప్రభుత్వమే ధరలు నిర్ణయించి.. కనీస మద్దతుగా బస్తాకు రూ.16వేలు చెల్లిస్తే రైతులకు న్యాయం జరుగుతుందన్నారు. ఈ విషయంపై  మంత్రి డాక్టర్‌ సీదిరి అప్పలరాజుకు, కలెక్టర్‌ నివాస్‌కు కూడా లేఖ అందజేశామని తెలిపారు.