ఆదాయం పోయే..!

మార్చిలో రూ.47.24 కోట్ల ఆదాయాన్ని కోల్పోయిన రైల్వే

లాక్‌డౌన్‌ ప్రభావం వల్లే..

కిందటి ఏడాదితో పోలిస్తే మాత్రం ఈసారి పెరిగిన నికర ఆదాయం

గణాంకాలను విడుదల చేసిన రైల్వే అధికారులు

ఆంధ్రజ్యోతి, విజయవాడ : ఒక్క నెలలోనే రైల్వే ఆదాయం తారుమారైంది. కరోనా మహమ్మారి లేకపోయి ఉంటే విజయవాడ రైల్వే డివిజన్‌ ఆల్‌టైమ్‌ రికార్డు ఆదాయాన్ని నమోదు చేసి ఉండేది. మార్చి చివర్లో నిరాశ పరిచినప్పటికీ కిందటి ఆర్థిక సంవత్సరం కంటే ప్రస్తుత 2019-20 సంవత్సరం రైల్వే అధిక ఆదాయాన్ని సాధించింది. 2018-19లో ప్రయాణికుల రవాణాపరంగా రూ.993.49 కోట్ల నికర ఆదాయాన్ని విజయవాడ రైల్వే డివిజన్‌ ఆర్జించగా, 2019-20లో మాత్రం రూ.1,002.42 కోట్లు సాధించింది.

ఇది కిందటి ఏడాది కంటే రూ.9 కోట్లు అదనం. మార్చిలో కరోనా లేకపోయి ఉంటే.. రూ.100 కోట్లు ఆర్జించి ఉండేది. కిందటి ఆర్థిక సంవత్సరం 2018-19 మార్చిలో 71,71,937 మంది ప్రయాణికులు రాకపోకలు సాగిస్తే, 2019-20 ఆర్థిక సంవత్సరంలో లాక్‌డౌన్‌ మాసంలో 43,01,553 మందే ప్రయాణించారు. ఇక.. కిందటి ఆర్థిక సంవత్సరం 2018-19 ఒక్క మార్చిలోనే రూ.86.53 కోట్ల ఆదాయం వచ్చింది. ఈసారి లాక్‌డౌన్‌ కారణంగా రూ.39.30 కోట్లు మాత్రమే లభించింది.