రైతులతో రాజకీయమా?

మొక్కజొన్న పంట కొనాలంటే వైసీపీ నేతల సిఫార్సు కావాలా?

విజయనగరం పార్లమెంటరీ టీడీపీ అధ్యక్షుడు కిమిడి నాగార్జున

విజయనగరం (ఆంధ్రజ్యోతి), మే 17 : జిల్లాలో ఓ వైపు ప్రజలు కరోనాతో భయబ్రాంతులకు గురవుతుంటే... మరోవైపు అధికార పార్టీ నేతలు రైతుల జీవితాలతో చెలగాడం ఆడుకుంటున్నారని విజయనగరం పార్లమెంటరీ టీడీపీ అధ్యక్షుడు కిమిడి నాగార్జున ఆరోపించారు. ఈ మేరకు సోమవారం ఆయన ఓ ప్రకటన విడుదల చేశారు. కొనేవారు లేక ఏడాదిగా మొక్కజొన్న రైతులు ఇబ్బంది పడుతుంటే... ఈ విషయాన్ని జిల్లా అధికారుల దృష్టికి తీసుకెళ్లినా ఫలితం లేకపోయిందన్నారు. ఈ ఏడాది జిల్లా వ్యాప్తంగా 30 శాతం మాత్రమే మొక్కజొన్న పంటను ప్రభుత్వం కొనుగోలు చేయడం దా రుణమన్నారు. అదీ కూడా అధికార పార్టీ నేతల సిఫార్సులు ఉన్నవారి నుంచే అధికారులు కొనుగోలు చేయడం ఎంతవరకు సమంజసమని ప్రశ్నించారు. ఆ పంటకు డిమాండ్‌ లేదనుకుంటే వ్యవసాయ శాఖ, మార్కెటింగ్‌ శాఖ ఉన్నది ఎందుకన్నారు. ఈ పంటకు డిమాండ్‌ లేదని ముందే చెబితే వేరే పంటను రైతులు సాగుచేసుకువారన్నారు. అప్పులు చేసి, కష్టించి పండించిన పంటను ఇప్పుడు ప్రభుత్వం కొనమంటే రైతులకు జరిగిన ఆ నష్టాన్ని ఎవరు భరిస్తారని ప్రశ్నించారు. ఇప్పటికైన జిల్లాకు చెందిన మంత్రులు, ఉన్నాతాధికారులు రైతుల సమస్యలను పరిగిణలోకి తేసుకుని, వారికి న్యాయం చేయాలని డిమాండ్‌ చేశారు.