పాడేరులో పెట్రోల్‌ కష్టాలు
ABN , First Publish Date - 2022-05-22T06:43:34+05:30 IST
అల్లూరి జిల్లా కేంద్రం పాడేరులో వాహనదారులకు రెండు రోజులుగా పెట్రోల్‌, డీజిల్‌ దొరకడం లేదు. పట్టణంలో నాలుగు పెట్రోల్‌ బంక్‌లు ఉండగా.. మూడు బంకుల్లో శుక్రవారం సాయంత్రం నుంచే డీజిల్‌, పెట్రోల్‌ లేదు.
రెండు రోజులుగా దొరకని డీజిల్‌, పెట్రోల్‌
వాహనదారులకు తప్పని తిప్పలు
పాడేరురూరల్‌, మే 21: అల్లూరి జిల్లా కేంద్రం పాడేరులో వాహనదారులకు రెండు రోజులుగా పెట్రోల్‌, డీజిల్‌ దొరకడం లేదు. పట్టణంలో నాలుగు పెట్రోల్‌ బంక్‌లు ఉండగా.. మూడు బంకుల్లో శుక్రవారం సాయంత్రం నుంచే డీజిల్‌, పెట్రోల్‌ లేదు. దీంతో ఆయా బంక్‌ల వద్ద నో-స్టాక్‌ బోర్డులు పెట్టి వాహనాలు రాకుండా తాళ్లను అడ్డంగా కట్టారు. ఇక ఉన్న ఒక్క బంక్‌ వద్ద ఉన్న కొద్దిపాటి పెట్రోల్‌కు వాహనదారులు క్యూ కట్టారు. గంటల కొలది నిరీక్షించి అర లీటరు, లీటరు పెట్రోల్‌ వేయించుకొని వెళుతున్నారు. ఇదిలా ఉండగా మార్గమద్యంలో ఆగిపోయిన వాహనదారులు బంక్‌ల వద్దకు వచ్చి బతిమలాడుకుంటూ బాటిళ్లలో అరలీటరు పెట్రోల్‌ను తీసుకువెళ్తున్నారు. దాంతో వాహనదారులు వాహనాలను నడిపే పరిస్థితి కానరావడం లేదు. దీంతో కొంతమంది హుకుంపేట, జి.మాడుగుల, పెదబయలు మండల కేంద్రాల వైపు పెట్రోల్‌ కోసం పరుగు తీస్తున్నారు. పెట్రోల్‌, డీజిల్‌ కొరతపై బంక్‌ యజమానులను ప్రశ్నించగా.. గతంలో మాదిరిగా ఇంధన సరఫరా కావడం లేదన్నారు. కోటా తగ్గిపోవడంతో రోజూ రావాల్సిన ఇంధనం రెండు రోజులకు ఒకసారి వస్తున్నదన్నారు.
