పొగాకు కిలో రూ.188

ఒక్క రూపాయు పెరిగిన గరిష్ఠ ధర

ఒంగోలు, జూన్‌ 29 (ఆంధ్రజ్యోతి) : పొగాకు గరిష్ఠ ధర ఒక్క రూపాయి పెరిగింది. రెండు వేలం కేంద్రాల్లో బుధవారం కిలో రూ.188 పలికింది. ఈ సీజన్‌ పొగాకు కొనుగోళ్లను ప్రారంభం రోజున మేలురకం గరిష్ఠ ధర కిలో రూ.185తో వ్యాపారులు ప్రారంభించారు. అనంతరం మీడియం, లోగ్రేడ్‌ రకాల ధరలను భారీగా పెంచి పొటీపడి కొనుగోలు చేస్తున్న వారు మేలురకం ధరలను మాత్రం అలాగే ఇస్తున్నారు. ప్రధాన కంపెనీలన్నీ ఆ విషయంలో కూటమి కట్టి సీలింగ్‌ పెట్టి రూ.185 లేదా 186తోనే నడిపిస్తున్నాయి. ఈ నేపథ్యంలో వారం క్రితం ఒక్క రూపాయి పెరిగింది. కనిగిరి వేలంకేంద్రంలో కొనుగోళ్ల ముగింపు రోజైన ఈనెల 22న కిలోకు రూ.187 ఇచ్చారు. సోమ, మంగళవారాల్లోనూ రెండు, మూడుచోట్ల ఆ ధర లభించగా బుధవారం మరో రూపాయి పెరిగింది. టంగుటూరు కొండపి వేలంకేంద్రాల్లో బుధవారం గరిష్ఠ ధరలు కిలో రూ.188 పలికాయి. అయితే ఆ కాస్త అయినా పెరగడం బయ్యర్లు ఈ వేలం మిషన్‌ బటన్‌ నొక్కడంలో తొందరపాటుతో తప్ప నిజంగా వ్యాపారుల మధ్య పోటీతో కాదని అధికారవర్గాల సమాచారం. కాగా మీడియం, లోగ్రేడ్‌ ధరలు భారీగా పెరిగినా మేలురకం ధరల్లో పెరుగుదల లేకపోవడంపై రైతుల్లో తీవ్ర అసంతృప్తి వ్యక్తమవుతోంది.