మూడేళ్ల చిన్నారిపై దాడి చేసిన కోతి.. కిడ్నాప్‌కు విఫలయత్నం

ఇంటర్నెట్ డెస్క్: బొమ్మ స్కూటర్‌తో ఇంటి బయట ఆడుకుంటున్న మూడేళ్ల చిన్నారిని ఓ కోతి కిడ్నాప్ చేసేందుకు ప్రయత్నించింది. అయితే స్థానికులు అలర్ట్ కావడంతో చిన్నారిని వదిలి అది అడవిలోకి పారిపోయింది. ప్రస్తుతం ఇందుకు సంబంధించిన దృశ్యాలు సోషల్ మీడియాలో వైరల్‌గా మారాయి. ఈ ఘటనకు సంబంధించిన పూర్తి వివరాల్లోకి వెళితే..

నైరుతి చైనాలో ఉన్న చాంగ్‌క్వింగ్ మున్సిపాలిటీలోని గ్రామప్రజలపై మంగళవారం మధ్యాహ్నం ఓ కోతి విరుచుకుపదింది. దాడి చేసి భయాందోళనలకు గురిచేసింది. అనంతరం ఇంటి బయట ఆడుకుంటున్న 3ఏళ్ల చిన్నారిపై దాడికి దిగింది. చిన్నారిని పడేసి, తనతో అడవిలోకి లాక్కెళ్లేందుకు ప్రయత్నించింది. అయితే స్థానికులు అలర్ట్ కావడంతో.. ఆ వానరం అక్కడ నుంచి పారిపోయింది. ఈ దృశ్యాలన్నీ స్థానికంగా ఉన్న కెమెరాలో రికార్డవగా ప్రస్తుతం అవి సోషల్ మీడియాలో వైరల్‌గా మారాయి. కాగా.. ఈ ఘటనపై గ్రామ ప్రజలు పోలీసులకు సమాచారం ఇచ్చారు. దీంతో అధికారులు విషయాన్ని ఫారెస్ట్ సిబ్బందికి తెలియజేశారు. దీంతో ఫారెస్ట్ అధికారులు స్పందిస్తూ.. ఇకపై ఇటువంటి ఘటనలు చోటు చేసుకోకుండా చర్యలు తీసుకోనున్నట్టు చెప్పారు. ఇదిలా ఉంటే.. ఈ దాడిలో పాప స్వల్పంగా గాయపడినట్లు తెలుస్తోంది.