ఫరీదాబాద్ హోటల్ నుంచి పారిపోయిన వికాస్ దూబే

న్యూఢిల్లీ : మోస్ట్ వాంటెడ్ కాన్పూర్ గ్యాంగస్టర్ వికాస్ దూబే ఫరీదాబాద్ హోటల్ నుంచి పోలీసుల బారి నుంచి మరో సారి తప్పించుకున్నాడు. కాన్పూరులో 8 మంది పోలీసులను చంపి తప్పించుకు తిరుగుతున్న ముఠా నాయకుడు వికాస్ దూబే ఢిల్లీ-మధుర జాతీయ రహదారిపై ఫరీదాబాద్ నగరంలోని బద్కల్ చౌక్ ప్రాంతంలో ఉన్న ఓ హోటల్ లో దాక్కున్నాడని స్థానిక పోలీసులకు సమాచారం వచ్చింది. అంతే స్పెషల్ టాస్క్ ఫోర్స్ టీం పోలీసులు వికాస్ దూబేను పట్టుకునేందుకు దాడి చేయగా, అప్పటికే అతను హోటల్ నుంచి పారిపోయాడు. వికాస్ దూబేతో పాటు కలిసి ఉన్న అతని అనుచరుడు ఒకరిని పోలీసులు అరెస్టు చేశారు. వికాస్ దూబేను పట్టుకునేందుకు 35 మంది ఎస్టీఎఫ్ పోలీసులు మఫ్టీలో హోటల్ పై దాడి చేశారు. హోటల్ యజమానితోపాటు హోటల్ సిబ్బందిని పోలీసులు ప్రశ్నిస్తున్నారు. వికాస్ దూబే ముఖానికి మాస్క్ ధరించి నిలబడి ఉన్న ఫొటోను పోలీసులు హోటల్ సిబ్బందికి చూపించారు. హోటల్ లో రికార్డులను సీజ్ చేసి వికాస్ దూబే మకాం గురించి ఆరా తీస్తున్నారు. పోలీసు బృందాలు వికాస్ దూబే కోసం ఇప్పటికే 100ప్రాంతాల్లో దాడులు చేసినా అతను దొరకలేదు.