జిగ్నేష్ మేవానీ మళ్లీ అరెస్ట్.. బెయిల్ పొందిన కొద్దిసేపటికే కొత్త కేసు..

గువహటి : కాంగ్రెస్ నేత, గుజరాత్ ఎమ్మెల్యే జిగ్నేష్ మేవానీని అసోం పోలీసులు మళ్లీ అరెస్ట్ చేశారు. ప్రధాని మోడీపై వివాదాస్పద ట్వీట్ల కేసులో సోమవారం బెయిల్ పొందిన కొద్దిసేపటికే కొత్త కేసులో జిగ్నేష్‌ను అక్కడి పోలీసులు అదుపులోకి తీసుకున్నారు. అసోంలోని బార్పెటా పోలీసులు మేవానీని అరెస్ట్ చేశారు. అయితే ఏ కేసులో అరెస్ట్ చేశారనే విషయాన్ని ఇప్పటివరకు వెల్లడించలేదని సమాచారం.

కాగా గత బుధవారం రాత్రి 11 గంటల సమయంలో గుజరాత్‌లోని పాలంపూర్ ప్రాంతంలో జిగ్నేష్ మేవానీని అసోంకు చెందిన పోలీసు బృందం అరెస్ట్ చేసింది. ప్రధాని మోడీని వ్యతిరేకిస్తూ జిగ్నేష్ మేవానీ చేసిన రెండు ట్వీట్లే ఇందుకు కారణమయ్యాయి. ట్వీట్లపై అభ్యంతరం తెలుపుతూ అసోంకు చెందిన ఓ వ్యక్తి స్థానిక కోక్రఝర్‌లో పోలీసులకు ఫిర్యాదు చేశాడు. నేరపూరిత కుట్ర, మతఘర్షణలకు దారితీసేలా రెచ్చగొట్టడంతోపాటు ఇతర అంశాలను పేర్కొన్న పోలీసులు విచారణ నిమిత్తం మేవానీని అరెస్ట్ చేసిన విషయం తెలిసిందే.