ఉదయం బ్రేక్‌ఫాస్ట్‌తో బరువు తగ్గించుకోవచ్చు..ఎలాగంటే..

ఆంధ్రజ్యోతి(16-03-2020)

అధిక బరువు తగ్గించుకునేందుకు రకరకాల పద్ధతులు పాటిస్తుంటారు. కొంతమంది ఉదయం బ్రేక్‌ఫాస్ట్ తీసుకోవడం మానేస్తే బరువు తగ్గించుకోవచ్చని భావిస్తుంటారు. అయితే అందులో ఎంతమాత్రం నిజంలేదని పరిశోధకులు చెబుతున్నారు. ఉదయం బ్రేక్‌ఫాస్ట్ తీసుకోవడం మానేస్తే బరువు మరింత పెరుగుతారు తప్ప, తగ్గరని వారంటున్నారు. జర్మనీకి చెందిన లుబెక్ యూనివర్సిటీ పరిశోధకులు 23 సంవత్సరాల వయస్సున్న 16 మందిని రెండు గ్రూపులుగా విభజించి వారికి మూడురోజుల పాటు రకరకాల ఆహారం ఇచ్చారు. ఒక గ్రూపు వారికి అధికంగా కేలరీలున్న ఆహారాన్ని ఉదయం బ్రేక్‌ఫాస్ట్ రూపంలో ఇస్తే.. అదే ఆహారాన్ని రెండో గ్రూపు వారికి రాత్రి డిన్నర్ రూపంలో ఇచ్చారు. తరువాత వారం గ్యాప్ ఇచ్చి మళ్లీ అదే విధంగా ఆహారం ఇచ్చారు. ఉదయం అధిక కేలరీలు ఉన్న ఆహారాన్ని బ్రేక్‌ఫాస్ట్ రూపంలో తీసుకున్న వారి మెటబాలిజం  పెరిగిందనీ, వారిలో కేలరీలు త్వరగా, ఖర్చవుతున్నాయని, అదే రెండో గ్రూపు వారిలో మెటబాలిజం తగ్గిందని గుర్తించారు.