ఈసారి 1,300 మంది కాదు... 100 మందే : రాష్ట్రపతి భవన్

న్యూఢిల్లీ : కరోనా ఎఫెక్ట్ అన్ని రంగాలపై పడిన విషయం తెలిసిందే. అయితే... కొన్ని ముఖ్యమైన ఘట్టాలపై కూడా కోవిడ్ ఎఫెక్ట్ పడింది. ఆగస్టు 15 స్వాతంత్ర్య దినోత్సవాన్ని పురస్కరించుకొని రాష్ట్రపతి భవన్‌లో ‘ఎట్ హోం’ కార్యక్రమాన్ని అత్యంత ఘనంగా జరుపుతారు. ఈ కార్యక్రమానికి ప్రధాని, కేంద్ర మంత్రులు, అన్ని పార్టీల ప్రముఖులు, వివిధ రంగాలకు చెందిన ప్రముఖులు ఈ కార్యక్రమంలో పాల్గొంటారు.

మామూలుగా అయితే ఈ కార్యక్రమానికి 1,200 నుంచి 1,300 మంది అతిథులు హాజరవుతారు. కానీ.. కోవిడ్ కారణంగా ఈ సంఖ్యను గణనీయంగా తగ్గించింది రాష్ట్రపతి భవన్. ఈ సారి కేవలం 90 నుంచి 100 మంది అతిథులను మాత్రమే ఈ కార్యక్రమానికి ఆహ్వానించాలని రాష్ట్రపతి భవన్ అధికారులు నిర్ణయం తీసుకున్నారు. ఈ కార్యక్రమానికి కూడా కోవిడ్ నిబంధనలు కచ్చితంగా పాటించేలా అధికారులు సర్వ సన్నాహాలు చేస్తున్నారు.