ఆగస్టు 12న సంపూర్ణ సూర్యగ్రహణం.. ఈ జాగ్రత్తలు తప్పక తెలుసుకోండి!

ఇంటర్నెట్ డెస్క్: 2026 ఆగస్టు 12న జరిగే సంపూర్ణ సూర్యగ్రహణం కోసం ప్రపంచవ్యాప్తంగా ఖగోళ ప్రేమికులు ఆసక్తిగా ఎదురుచూస్తున్నారు. ఈ గ్రహణం గ్రీన్‌ల్యాండ్, ఐస్‌లాండ్, ఉత్తర రష్యా, అట్లాంటిక్ మహాసముద్రం, స్పెయిన్, పోర్చుగల్‌లోని కొన్ని ప్రాంతాల్లో కనిపించనుంది. అలాగే ఉత్తరార్ధగోళంలోని కొన్ని ప్రాంతాల్లో పాక్షిక సూర్యగ్రహణం కూడా కనిపిస్తుంది. ఉత్తర అమెరికాలోని కొన్ని ప్రాంతాలు, కెనడా, యూరప్‌లోని అనేక ప్రాంతాలు, వాయువ్య ఆఫ్రికాలో ఈ దృశ్యం కనిపించే అవకాశం ఉంది.

సంపూర్ణ సూర్యగ్రహణం అంటే ఏమిటి?

చంద్రుడు భూమికి, సూర్యుడికి మధ్యలోకి వచ్చి సూర్యుడిని పూర్తిగా కప్పివేసినప్పుడు సంపూర్ణ సూర్యగ్రహణం ఏర్పడుతుంది. ఈ సమయంలో పగటి పూటే ఆకాశం చీకటిగా మారుతుంది. ఉష్ణోగ్రతలు తగ్గుతాయి. కొన్ని సందర్భాల్లో నక్షత్రాలు, గ్రహాలు కూడా కనిపించే అవకాశం ఉంటుంది. సంపూర్ణ గ్రహణ సమయంలో సూర్యుడి చుట్టూ ఉండే బాహ్య వాతావరణ పొర అయిన కరోనాను కూడా చూడవచ్చు. కానీ సూర్యుడి వెలుతురు కారణంగా ఇది కనిపించదు.

తీసుకోవాల్సిన జాగ్రత్తలు

సన్ గ్లాసెస్ ఉపయోగించాలి

సాధారణ సన్‌గ్లాసెస్ సూర్యకిరణాలను పూర్తిగా అడ్డుకోలేవు. తప్పనిసరిగా ISO 12312-2 ప్రమాణాలకు అనుగుణంగా ఉన్న ప్రత్యేక సన్ గ్లాసెస్ లేదా సోలార్ వ్యూయర్‌లను ఉపయోగించాలి. కళ్లద్దాల్లో గీతలు లేదా పగుళ్లు ఉంటే వాటిని ఉపయోగించకూడదు. దెబ్బతిన్న కళ్లద్దాలను వెంటనే మార్చాలి.

గ్రహణ సమయంలో ఎప్పుడు కళ్లద్దాలు తీసేయాలి?

గ్రహణం పాక్షిక దశలో ఉన్నప్పుడు కళ్లద్దాలు ధరించాలి. చంద్రుడు సూర్యుడిని పూర్తిగా కప్పే సంపూర్ణ గ్రహణ సమయంలో మాత్రమే కొద్దిసేపు కళ్లద్దాలు తీసేయవచ్చు. సూర్యుడు మళ్లీ కనిపించడం ప్రారంభించిన వెంటనే కళ్లద్దాలు తిరిగి పెట్టుకోవాలి.

ఫిల్టర్ లేకుండా కెమెరా, టెలిస్కోప్ వాడకూడదు

కెమెరా, బైనాక్యులర్స్ లేదా టెలిస్కోప్ ద్వారా నేరుగా సూర్యుడిని చూడకూడదు. సరైన ఫిల్టర్ లేకపోతే కళ్లకు తీవ్ర నష్టం కలిగే ప్రమాదం ఉంటుంది.

పరోక్షంగా వీక్షించాలి

ప్రత్యేక కళ్లద్దాలు లేకపోతే పిన్‌హోల్ ప్రొజెక్టర్, జల్లెడ లేదా ఇతర పరోక్ష పద్ధతుల ద్వారా సూర్యగ్రహణాన్ని చూడవచ్చు. సూర్యుడిని నేరుగా చూడకుండా, నేలపై పడే నీడలను గమనించడం మంచిది. ఎక్కువసేపు ఎండలో ఉండాల్సి వస్తే సన్‌స్క్రీన్ రాసుకోవాలి.

భారతదేశంలో సంపూర్ణ సూర్యగ్రహణం కనిపిస్తుందా?

2026 ఆగస్టు 12న జరిగే సంపూర్ణ సూర్యగ్రహణం భారత్‌లో కనిపించదు. భారత కాలమానం ప్రకారం.. ఈ గ్రహణం ఆగస్టు 12 రాత్రి సుమారు 9:45 గంటల నుంచి ఆగస్టు 13 తెల్లవారుజామున 2:15 గంటల వరకు ఉంటుంది. ఆ సమయంలో భారత్‌లో సూర్యుడు అస్తమించి ఉండటం వల్ల ఈ ఖగోళ అద్భుతాన్ని మన దేశం నుంచి వీక్షించే అవకాశం ఉండదు.

Also Read:

జాగ్రత్త.. ఈ సంఖ్య గల వ్యక్తులు ప్రేమలో మోసపోతారు.!

సొరకాయ రసం తాగే ముందు జాగ్రత్త.. ఈ తప్పు చేయకండి