తూటాలకు తూటాలే సమాధానం: మహారాష్ట్ర డిప్యూటీ సీఎం
ABN , Publish Date - Oct 19 , 2026 | 12:34 PM
బాలీవుడ్ స్టార్ టైగర్ ష్రాఫ్‌పై కాల్పుల ఘటన ప్రస్తుతం దేశవ్యాప్తంగా కలకలం రేపుతోంది. ఈ ఘటనలో స్వల్ప గాయాలపాలైన నటుడిని మహారాష్ట్ర డిప్యూటీ సీఎం ఏక్‌నాథ్ షిండే తాజాగా పరామర్శించారు.
ఇంటర్నెట్ డెస్క్: బాలీవుడ్ స్టార్ టైగర్ ష్రాఫ్‌పై కాల్పుల ఘటన ప్రస్తుతం దేశవ్యాప్తంగా కలకలం రేపుతోంది. ఈ ఘటనలో స్వల్ప గాయాలపాలైన నటుడిని మహారాష్ట్ర డిప్యూటీ సీఎం ఏక్‌నాథ్ షిండే తాజాగా పరామర్శించారు. ష్రాఫ్ కుటుంబానికి పూర్తి భద్రత కల్పిస్తామని హామీ ఇచ్చారు. తూటాకు తూటానే సమాధానమని నిందితులకు హెచ్చరికలు జారీ చేశారు. ముంబైలో గ్యాంగ్ వార్స్‌ను సహించబోమని స్పష్టం చేశారు.
ఆదివారం సాయంత్రం గుర్తు తెలియని వ్యక్తులు జుహూలో (ముంబై) ష్రాఫ్ ఉన్న కారుపై కాల్పులు జరిపిన విషయం తెలిసిందే. ఈ ఘటనలో నటుడికి స్వల్ప గాయాలయ్యాయి. ఈ దాడికి తామే కారణమని లారెన్స్‌ బిష్ణోయ్ గ్యాంగ్ చెప్పినట్టు ఉన్న ఓ పోస్టు వైరల్‌గా మారింది.
ఈ నేపథ్యంలో నటుడు ష్రాఫ్‌ను పరామర్శించిన అనంతరం షిండే మీడియాతో మాట్లాడుతూ గ్యాంగ్‌లను నామరూపాలు లేకుండా చేయాల్సిన సమయం ఆసన్నమైందని అన్నారు. వీళ్ల మూలాలూ 1990ల నాటి కాలం నుంచీ కొనసాగుతున్నాయని చెప్పారు. సెలబ్రిటీలకు క్రిమినల్ గ్యాంగుల బెదిరింపులను ఎంత మాత్రం సహించబోమని షిండే స్పష్టం చేశారు. ఈ ఘటనపై పోలీసులు లోతైన దర్యాప్తు జరుపుతున్నారని చెప్పారు.
ఈ వార్తలనూ చదవండి:
‘ఎవరినీ వదిలిపెట్టం’.. టైగర్ ష్రాఫ్‌పై కాల్పుల నేపథ్యంలో సీఎం ఫడ్నవీస్ వార్నింగ్
టైగర్ ష్రాఫ్ కాల్పుల ఘటనతో వెలుగులోకి అనిల్ పండిట్ పేరు.. ఇంతకీ అతడెవరు?