వర్షాకాలంలో ఇంట్లో క్రిములు పెరగకుండా ఉండాలంటే.. ఈ చిట్కాలు పాటించండి!

ఇంటర్నెట్ డెస్క్: వర్షాకాలంలో వాతావరణంలో తేమ పెరగడంతో ఇళ్లలో బూజు, బ్యాక్టీరియా, ఇతర సూక్ష్మజీవులు పెరిగే అవకాశం ఉంటుంది. ముఖ్యంగా వంటగది, బాత్రూమ్, సింక్‌ వంటి తడి ప్రదేశాల్లో వీటి ప్రభావం ఎక్కువగా ఉంటుంది. అందుకే ఇంటిని శుభ్రంగా, పొడిగా, గాలి బాగా ప్రసరించేలా ఉంచడం చాలా ముఖ్యం.

తరచుగా తాకే ప్రదేశాలను శుభ్రం చేయండి

తలుపుల హ్యాండిల్స్‌, లైట్‌ స్విచ్‌లు, టేబుళ్లు వంటి వాటిని క్రమం తప్పకుండా శుభ్రం చేయాలి. వీటిపై దుమ్ము, మురికి పేరుకుపోకుండా సబ్బు నీరు లేదా ఇంట్లో ఉపయోగించే సర్ఫేస్‌ క్లీనర్‌తో తుడవచ్చు.

వంటగదిపై ప్రత్యేక శ్రద్ధ

వంటగదిలోని సింక్‌, కౌంటర్లు, స్టవ్‌ వంటి ప్రదేశాలను రోజూ శుభ్రం చేయడం మంచిది. వాడిన పాత్రలను ఎక్కువసేపు అలాగే ఉంచకుండా వెంటనే కడగాలి. గిన్నెలు తుడిచే గుడ్డలు, స్పాంజ్‌లను తడిగా వదిలేయకుండా కడిగి, నీటిని పిండేసి గాలి తగిలే ప్రదేశంలో ఆరబెట్టాలి. పచ్చి మాంసం, కూరగాయల కోసం వేర్వేరు కటింగ్‌ బోర్డులు ఉపయోగిస్తే ఆహారంలో సూక్ష్మజీవులు వ్యాపించే ప్రమాదాన్ని తగ్గించవచ్చు.

బాత్రూమ్‌ను పొడిగా ఉంచండి

వర్షాకాలంలో బాత్రూమ్‌లో తేమ పెరగడంతో బూజు ఏర్పడే అవకాశం ఉంటుంది. స్నానం చేసిన తర్వాత నేలపై ఉన్న నీటిని వీలైనంత త్వరగా తుడవాలి. బాత్రూమ్‌లో గాలి, వెలుతురు బాగా వచ్చేలా చూసుకోవాలి. టాయిలెట్‌, సింక్‌, నేల వంటి ప్రదేశాలను క్రమం తప్పకుండా శుభ్రం చేయాలి.

ఇంట్లో దుమ్ము పేరుకుపోకుండా చూసుకోండి

కిటికీలు, ఫర్నిచర్‌, అల్మారాలు, షెల్ఫ్‌లపై దుమ్ము పేరుకుపోకుండా క్రమం తప్పకుండా శుభ్రం చేయాలి. ముందుగా పైభాగాల్లోని దుమ్మును తొలగించి, ఆ తర్వాత వాక్యూమ్‌ చేయడం లేదా ఊడవడం, చివరగా నేలను తుడవడం మంచిది. ఇలా చేయడం వల్ల ఇంట్లో దుమ్ము, అలర్జీ కారకాలు తగ్గించుకోవచ్చు.

శుభ్రం చేసే గుడ్డలు, స్పాంజ్‌లను ఆరబెట్టండి

మాప్‌లు, స్పాంజ్‌లు, శుభ్రం చేసే గుడ్డల్లో కూడా క్రిములు పెరిగే అవకాశం ఉంటుంది. ఉపయోగించిన తర్వాత వాటిని బాగా కడిగి, నీటిని పిండేసి పూర్తిగా ఆరబెట్టాలి. ముఖ్యంగా.. వర్షాకాలంలో ఇంట్లో గాలి, వెలుతురు బాగా ప్రసరించేలా చూసుకోవాలి. ఇంటిని పొడిగా, శుభ్రంగా ఉంచడం వల్ల తేమ, బూజు పెరుగుదలను నియంత్రించడంతో పాటు ఆరోగ్య సమస్యల ముప్పును కూడా తగ్గించుకోవచ్చు.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ప్రెషర్‌ కుక్కర్‌ విజిల్‌ వేస్తూ నీరు కారుతోందా? ఈ సింపుల్‌ చిట్కాలతో సమస్యకు చెక్‌

దానం చేసేటప్పుడు ఈ 5 తప్పులు చేయొద్దు