రాత్రి పడుకునే ముందు ఈ తప్పులు చేయొద్దు.. నిద్ర, ఆరోగ్యంపై ప్రభావం!

ఇంటర్నెట్ డెస్క్: ప్రస్తుత కాలంలో నిద్రలేమి సమస్య చాలా మందిని వేధిస్తోంది. ఒత్తిడి, అనారోగ్యకరమైన ఆహారపు అలవాట్లు, శారీరక శ్రమ లేకపోవడం వంటి కారణాలతో పాటు, రాత్రి పడుకునే ముందు చేసే కొన్ని పొరపాట్లు కూడా నిద్ర నాణ్యతను దెబ్బతీస్తాయి. ఇవి దీర్ఘకాలంలో ఆరోగ్యంపై చెడు ప్రభావం చూపే అవకాశం ఉంది. అందుకే రాత్రి నిద్రకు ముందు ఈ అలవాట్లకు దూరంగా ఉండటం మంచిది.

ఎక్కువగా భోజనం చేయొద్దు

పడుకునే ముందు అధికంగా లేదా బరువైన ఆహారం తీసుకోవడం వల్ల జీర్ణవ్యవస్థపై భారం పడుతుంది. దీంతో అజీర్ణం, గ్యాస్, అసిడిటీ, కడుపు ఉబ్బరం వంటి సమస్యలు తలెత్తవచ్చు. కాబట్టి రాత్రి భోజనాన్ని పడుకునే 2-3 గంటల ముందే ముగించడం మంచిది.

మొబైల్, ల్యాప్‌టాప్ వినియోగం

చాలా మంది నిద్రకు ముందు ఫోన్‌లో వీడియోలు, సోషల్ మీడియా చూస్తూ సమయం గడుపుతుంటారు. అయితే మొబైల్, టాబ్లెట్, ల్యాప్‌టాప్‌ల నుంచి వెలువడే బ్లూ లైట్‌ మెలటోనిన్‌ హార్మోన్‌ ఉత్పత్తిని తగ్గిస్తుంది. ఇది నిద్ర పట్టడాన్ని ఆలస్యం చేస్తుంది. కాబట్టి నిద్రకు కనీసం గంట ముందు ఎలక్ట్రానిక్ పరికరాలకు దూరంగా ఉండటం మంచిది.

కెఫిన్ తీసుకోవద్దు

కాఫీ, టీ, చాక్లెట్, కొన్ని శీతల పానీయాల్లో కెఫిన్ ఉంటుంది. సాయంత్రం లేదా రాత్రి సమయంలో వీటిని ఎక్కువగా తీసుకుంటే నిద్రపై ప్రభావం పడే అవకాశం ఉంది. అలాగే మద్యం సేవించడం కూడా నిద్ర నాణ్యతను దెబ్బతీయవచ్చు.

ఐస్‌క్రీమ్ తినడం మంచిది కాదు

రాత్రి భోజనం తర్వాత ఐస్‌క్రీమ్ తినడం చాలా మందికి ఇష్టం. అయితే ఐస్‌క్రీమ్‌లో చక్కెర, కొవ్వు అధికంగా ఉండటంతో జీర్ణక్రియ మందగించి నిద్రకు ఆటంకం కలిగించవచ్చు. అందువల్ల నిద్రకు ముందు ఐస్‌క్రీమ్ లేదా అధిక చక్కెర ఉన్న ఆహారాలను తగ్గించడం మంచిది.

ఆరోగ్యకరమైన నిద్ర కోసం...

• రోజూ ఒకే సమయానికి నిద్రపోవడం అలవాటు చేసుకోండి.

• పడుకునే ముందు ప్రశాంతమైన వాతావరణాన్ని ఏర్పరచుకోండి.

• తేలికపాటి ఆహారం తీసుకోండి.

• ఒత్తిడిని తగ్గించే అలవాట్లు పాటించండి.

మంచి నిద్ర శారీరక, మానసిక ఆరోగ్యానికి ఎంతో అవసరం. అందుకే పడుకునే ముందు చేసే చిన్న చిన్న పొరపాట్లను సరిదిద్దుకోవడం ముఖ్యం.

Also Read:

న్యూజిలాండ్‌ క్రికెట్‌‌లో విషాదం.. ఐకానిక్ ప్లేయర్ మృతి

SIR జాబితా నుంచి పేరు తొలగిస్తే రేషన్ ఇవ్వరా?.. సుప్రీంకోర్టు ఆశ్చర్యం