ఒమన్ సమీపంలో కంటైనర్ నౌకపై ఇరాన్ IRGC దాడి

ఇంటర్నెట్ డెస్క్, ఏప్రిల్ 22: పశ్చిమాసియాలో సముద్ర భద్రతపై ఆందోళనలు పెరుగుతున్నాయి. ఇవాళ ఒమన్‌కు ఈశాన్యంగా 15 నాటికల్ మైళ్ల దూరంలో ఉన్న ఒక కంటైనర్ నౌకపై ఇరాన్ రివల్యూషనరీ గార్డ్ కార్ప్స్ (IRGC) దాడికి పాల్పడింది. ఈ ఘటనలో నౌక బ్రిడ్జ్ (Bridge) భాగం తీవ్రంగా దెబ్బతిన్నట్లు సమాచారం.

UKMTO నివేదిక ప్రకారం, ఒక IRGC గన్‌బోట్ కంటైనర్ నౌకను సమీపించింది. సాధారణంగా అనుసరించే రేడియో (VHF) హెచ్చరికలు ఏవీ జారీ చేయకుండానే, సదరు గన్‌బోట్ నేరుగా నౌకపై కాల్పులు ప్రారంభించింది. ఈ దాడిలో నౌక పైభాగం (బ్రిడ్జ్) భారీగా దెబ్బతిన్నప్పటికీ, నౌకలో మంటలు చెలరేగలేదు. అదృష్టవశాత్తూ, నౌకలోని సిబ్బంది అందరూ సురక్షితంగా ఉన్నారని నౌక కెప్టెన్ (మాస్టర్) నివేదించారు.

అమెరికా విధిస్తున్న నౌకాదళ దిగ్బంధం.. కాల్పుల విరమణ నిబంధనలను ఉల్లంఘించడమేనని ఆరోపిస్తూ, ఇరాన్ ఇటీవల హోర్ముజ్ జలసంధిని మూసివేసింది. ఏప్రిల్ 20న ఇరాన్ వాణిజ్య నౌకపై దాడి జరిగిన నేపథ్యంలో, అమెరికా యుద్ధనౌకలపైకి ఇరాన్ డ్రోన్‌లను ప్రయోగించింది. దీనికి కొనసాగింపుగానే తాజా దాడులు జరుగుతున్నట్లు భావిస్తున్నారు. కాగా, అమెరికా 'సముద్ర చౌర్యానికి'పాల్పడుతోందని ఇరాన్ సైనిక ప్రధాన కార్యాలయం ఆరోపించింది. ముఖ్యంగా ఇరాన్ నౌక 'టూస్కా' (TOUSKA) ను అమెరికా అడ్డుకోవడంతో ఈ ఉద్రిక్తతలు మరింత పెరిగాయి.

ఈ ప్రాంతంలో సముద్ర భద్రత క్లిష్టంగా మారడంతో, ప్రయాణించే అన్ని నౌకలు అత్యంత జాగ్రత్తగా ఉండాలని UKMTO సూచించింది. ఏదైనా అనుమానాస్పద కార్యకలాపాలు కనిపిస్తే వెంటనే నివేదించాలని కోరింది.