టీ, కాఫీ, కోలా పానీయాలు.. ఏది పళ్లకు ఎక్కువ హాని చేస్తుంది?

ఇంటర్నెట్ డెస్క్: చాలా మంది ఉదయం టీతో రోజు ప్రారంభిస్తారు. ఆఫీసులో కాఫీ తాగుతారు. ఇంకొంత మంది కోలా పానీయాలు కూడా తాగుతారు. కానీ ఈ పానీయాల్లో ఏది పళ్లకు ఎక్కువ హాని చేస్తుందో చాలా మందికి తెలియదు.

ఆరోగ్య నిపుణులు తెలిపిన సమాచారం ప్రకారం.. ఈ మూడు పానీయాలు నోటి ఆరోగ్యంపై ప్రభావం చూపుతాయి కానీ వాటి ప్రభావం వేరుగా ఉంటుంది. పళ్లపై మరకల విషయానికి వస్తే బ్లాక్ టీనే ఎక్కువ ప్రభావం చూపుతుంది.

బ్లాక్ టీ

బ్లాక్ టీలో ఉండే టానిన్లు, రంగు పదార్థాలు పళ్ల పై పొర (ఎనామెల్) కు అతుక్కుంటాయి. కాలక్రమేణా ఇవి పళ్లను పసుపు లేదా గోధుమ రంగులోకి మార్చుతాయి. రోజూ ఎక్కువ టీ తాగేవారిలో ఈ సమస్య ఎక్కువగా కనిపిస్తుంది. దీర్ఘకాలంగా దంత శుభ్రతను పట్టించుకోకపోతే మరకలు ఇంకా ఎక్కువగా కనిపిస్తాయి.

కాఫీ

కాఫీ కూడా పళ్లపై మరకలు ఏర్పడేందుకు ప్రధాన కారణాల్లో ఒకటి. ఇందులో ఉండే రంగు పదార్థాలు పళ్ల పైపొరకు అతుక్కుని, కాలక్రమేణా పళ్లను పసుపు లేదా గోధుమ రంగులోకి మారుస్తాయి. ముఖ్యంగా రోజుకు పలుమార్లు కాఫీ తాగే వారిలో ఈ సమస్య ఎక్కువగా కనిపిస్తుంది. కాఫీలో చక్కెర కలపడం వల్ల నేరుగా మరకలు పెరగకపోయినా, అది దంత క్షయం, ఇతర నోటి ఆరోగ్య సమస్యలకు దారితీసే అవకాశం ఉంటుంది.

కోలా పానీయాలు

కోలా పానీయాలు పళ్లకు ఎక్కువ హాని చేస్తాయని చాలా మంది భావిస్తారు. అయితే, పళ్లపై మరకలు ఏర్పడే విషయంలో ఇది టీ లేదా కాఫీతో పోలిస్తే తక్కువ ప్రభావం చూపుతుంది. కానీ ఇందులో ఉండే ఆమ్లాలు పళ్లను రక్షించే ఎనామెల్‌ను క్రమంగా బలహీనపరుస్తాయి. ఎనామెల్ దెబ్బతింటే ఇతర ఆహారాలు, పానీయాల వల్ల వచ్చే మరకలు పళ్లకు సులభంగా అంటుకునే అవకాశం ఉంటుంది. అదనంగా, ఇందులోని అధిక చక్కెర దంత క్షయం ప్రమాదాన్ని కూడా పెంచుతుంది.

పళ్లను కాపాడుకునే సూచనలు:

• టీ,కాఫీ, కోలా పానీయాలు తాగిన తర్వాత నీటితో నోరు పుక్కిలించాలి.

• కోలా పానీయాలు తాగిన వెంటనే బ్రష్ చేయకూడదు.

• స్ట్రా ఉపయోగించడం మంచిది.

• చక్కెర తగ్గించాలి.

• రోజుకు రెండుసార్లు ఫ్లోరైడ్ టూత్‌పేస్ట్‌తో బ్రష్ చేయాలి.

• రెగ్యులర్‌గా దంత వైద్యులని కలవాలి.

Note: ఇందులోని సమాచారం సాధారణ అవగాహన కోసం మాత్రమే.. ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

విండ్ చైమ్.. ఈ ప్రదేశాల్లో అస్సలు పెట్టకండి

ఫిట్‌నెస్ కోసం భోజనం మానేస్తున్నారా? జాగ్రత్త..