ముక్కు దిబ్బడతో ఇబ్బందిగా ఉందా? ఈ ఇంటి చిట్కాలతో ఉపశమనం

ఇంటర్నెట్ డెస్క్: జలుబు, వైరల్‌ ఇన్ఫెక్షన్‌, దుమ్ము లేదా అలర్జీల కారణంగా చాలా మందికి ముక్కు దిబ్బడ సమస్య వస్తుంటుంది. దీని వల్ల శ్వాస తీసుకోవడంలో ఇబ్బంది కలగడమే కాకుండా.. నిద్ర, రోజువారీ పనులు, ఏకాగ్రతపై కూడా ప్రభావం పడుతుంది. కొన్ని సులభమైన ఇంటి చిట్కాలను పాటించడం ద్వారా ముక్కు దిబ్బడ నుంచి కొంత ఉపశమనం పొందవచ్చని ఆరోగ్య నిపుణులు సూచిస్తున్నారు.

గోరువెచ్చని నీరు తాగాలి

ఆరోగ్య నిపుణుల ప్రకారం.. గోరువెచ్చని నీరు తాగడం వల్ల శరీరానికి వెచ్చదనం అందుతుంది. దీంతో ముక్కులో పేరుకుపోయిన శ్లేష్మం (మ్యూకస్‌) పలుచగా మారి బయటకు రావడానికి సహాయపడుతుంది. నాసికా మార్గాలు తెరుచుకుని శ్వాస తీసుకోవడం సులభంగా మారుతుంది. మరింత ప్రయోజనం కోసం గోరువెచ్చని నీటిలో అల్లం కలిపి తీసుకోవచ్చు. అల్లం, మిరియాలతో తయారు చేసిన కషాయం గొంతు నొప్పి, ముక్కు వాపు వంటి సమస్యలను తగ్గించడంలో సహాయపడుతుంది.

కాస్త కారంగా ఉండే ఆహారం తీసుకోవాలి

మిరపకాయల్లో ఉండే క్యాప్సైసిన్‌ అనే పదార్థం ముక్కులోని మార్గాలను తాత్కాలికంగా తెరుచుకునేలా చేస్తుంది. అందువల్ల మితంగా కారంగా ఉండే ఆహారం తీసుకోవడం వల్ల ముక్కు దిబ్బడ నుంచి కొంత ఉపశమనం లభించవచ్చు.

ఆవిరి పట్టడం మంచి పరిష్కారం

ముక్కు దిబ్బడకు ఆవిరి పట్టడం చాలా ప్రభావవంతమైన ఇంటి చిట్కాల్లో ఒకటి. వేడి ఆవిరి ముక్కులో పేరుకుపోయిన శ్లేష్మాన్ని కరిగించి బయటకు రావడానికి సహాయపడుతుంది. అలాగే సైనస్‌ ఒత్తిడి, వాపును కూడా తగ్గించడంలో ఉపయోగపడుతుంది.

వేడి నీటి గుడ్డతో కాపడం పెట్టాలి

శుభ్రమైన గుడ్డను వేడి నీటిలో ముంచి, నీరు పిండేసి ముక్కు చుట్టూ కొన్ని నిమిషాల పాటు ఉంచాలి. ఇలా చేయడం వల్ల ముక్కులోని నరాలు రిలాక్స్‌ అవుతాయి. సైనస్‌ ఒత్తిడి తగ్గి శ్వాస తీసుకోవడం సులభంగా మారుతుంది. ముక్కు దిబ్బడ చాలా రోజులు కొనసాగితే, తీవ్రమైన తలనొప్పి, జ్వరం, శ్వాస తీసుకోవడంలో ఇబ్బంది ఉంటే తప్పనిసరిగా వైద్యుల సలహా తీసుకోవాలి.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ప్రెషర్‌ కుక్కర్‌ విజిల్‌ వేస్తూ నీరు కారుతోందా? ఈ సింపుల్‌ చిట్కాలతో సమస్యకు చెక్‌

దానం చేసేటప్పుడు ఈ 5 తప్పులు చేయొద్దు