ప్రెగ్నెన్సీలో డయాబెటిస్ వస్తే భవిష్యత్తులో ప్రమాదమా?

ఇంటర్నెట్ డెస్క్: గర్భధారణ సమయంలో మహిళ శరీరంలో ఎన్నో హార్మోన్ల మార్పులు జరుగుతాయి. ఈ మార్పుల కారణంగా కొందరిలో రక్తంలో చక్కెర స్థాయిలు తాత్కాలికంగా పెరుగుతాయి. ఈ పరిస్థితినే గర్భధారణ మధుమేహం అంటారు. సాధారణంగా ప్రసవం తర్వాత ఈ సమస్య తగ్గిపోతుంది. అయితే, భవిష్యత్తులో టైప్-2 మధుమేహం వచ్చే ప్రమాదాన్ని ఇది పెంచే అవకాశం ఉందని తాజా అధ్యయనాలు చెబుతున్నాయి.

స్వీడన్‌లో నిర్వహించిన ఒక అధ్యయనంలో 10 లక్షలకు పైగా మహిళల ఆరోగ్య వివరాలను పరిశీలించారు. ఈ పరిశోధన ఫలితాలు జర్నల్ ఆఫ్ క్లినికల్ మెడిసిన్‌లో ప్రచురితమైంది. గర్భధారణకు ముందు పూర్తిగా ఆరోగ్యంగా ఉన్న మహిళలకు కూడా గర్భధారణ మధుమేహం వస్తే, భవిష్యత్తులో టైప్-2 మధుమేహం వచ్చే ప్రమాదం పెరుగుతుందని పరిశోధకులు గుర్తించారు.

గర్భధారణ మధుమేహం అంటే ఏమిటి?

గర్భధారణ సమయంలో విడుదలయ్యే కొన్ని హార్మోన్లు ఇన్సులిన్ సరిగా పనిచేయకుండా ప్రభావితం చేస్తాయి. దీంతో శరీరంలో ఇన్సులిన్ నిరోధకత పెరిగి, రక్తంలో చక్కెర స్థాయిలు అధికమవుతాయి. ఈ పరిస్థితినే గర్భధారణ మధుమేహం అంటారు.

చాలా సందర్భాల్లో దీనికి బయటకు కనిపించే ప్రత్యేక లక్షణాలు ఉండవు. గర్భధారణ సమయంలో చేసే సాధారణ రక్త పరీక్షల ద్వారానే దీన్ని గుర్తిస్తారు. సరైన ఆహారం, వ్యాయామం, అవసరమైతే వైద్యుల సూచనలతో దీనిని నియంత్రించవచ్చు.

అధ్యయనం ఏమి చెబుతోంది?

ఈ పరిశోధనలో గర్భధారణ సమయంలో మధుమేహం వచ్చిన మహిళలకు, తర్వాత జీవితంలో టైప్-2 మధుమేహం వచ్చే ప్రమాదం ఎక్కువగా ఉందని గుర్తించారు. ఊబకాయం ఉన్న మహిళల్లో ఈ ప్రమాదం మరింత ఎక్కువగా ఉన్నప్పటికీ, సాధారణ బరువు ఉన్న మహిళలు కూడా ఈ ప్రమాదం నుంచి పూర్తిగా బయటపడలేరని అధ్యయనం వెల్లడించింది.

ప్రసవం తర్వాత కూడా జాగ్రత్త అవసరం

ఆరోగ్య నిపుణుల ప్రకారం.. గర్భధారణ అనేది మహిళకు ఒక రకమైన ఒత్తిడి వంటిది. ప్రసవం తర్వాత రక్తంలో చక్కెర స్థాయిలు మామూలు స్థితికి వచ్చినా, ఇన్సులిన్ నిరోధకత కొంతమందిలో కొనసాగవచ్చు.

వయసు పెరగడం, అనారోగ్యకరమైన జీవనశైలి, జన్యుపరమైన కారణాలు వంటి అంశాలు కలిసివస్తే, భవిష్యత్తులో టైప్-2 మధుమేహం వచ్చే అవకాశం పెరుగుతుంది. అందుకే గర్భధారణ మధుమేహాన్ని భవిష్యత్తు ఆరోగ్యానికి ఒక హెచ్చరిక సంకేతంగా పరిగణిస్తున్నారు.

ప్రమాదాన్ని ఎలా తగ్గించుకోవాలి?

గర్భధారణ సమయంలో మధుమేహం వచ్చిన ప్రతి మహిళకు భవిష్యత్తులో తప్పనిసరిగా టైప్-2 మధుమేహం వస్తుందనే లేదు. అయితే, ఆ ప్రమాదాన్ని తగ్గించుకోవాలంటే కొన్ని జాగ్రత్తలు తప్పనిసరిగా పాటించాలి.

• ప్రసవం తర్వాత వైద్యుల సూచన మేరకు రక్తంలో చక్కెర స్థాయిలను క్రమం తప్పకుండా పరీక్షించుకోవాలి.

• సమతుల్యమైన, పోషకాహారం తీసుకోవాలి.

• రోజూ వ్యాయామం చేయాలి.

• అధిక బరువు పెరగకుండా జాగ్రత్తపడాలి.

• వైద్యుల సూచనల మేరకు క్రమం తప్పకుండా ఆరోగ్య పరీక్షలు చేయించుకోవాలి.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ఫ్రిజ్ లేకుండానే టమోటాలు ఎక్కువ రోజులు తాజాగా ఉండాలా?

ఈ తేదీల్లో పుట్టినవారిది రాజసమైన వ్యక్తిత్వం..!