ఉదయం షుగర్ పెరగకుండా ఉండాలంటే.. ఈ జాగ్రత్తలు తీసుకోండి

ఇంటర్నెట్ డెస్క్: మధుమేహం ఉన్న చాలా మంది ఉదయం నిద్రలేవగానే రక్తంలో చక్కెర (బ్లడ్ షుగర్) స్థాయిలు ఎక్కువగా ఉండటాన్ని గమనిస్తుంటారు. దీనికి ప్రధాన కారణం తెల్లవారుజామున శరీరంలో విడుదలయ్యే కొన్ని హార్మోన్లు. వీటివల్ల కాలేయం ఎక్కువ గ్లూకోజ్‌ను విడుదల చేస్తుంది. ఈ పరిస్థితిని వైద్యులు 'డాన్ ఫినామినన్' అని పిలుస్తారు. అయితే కొన్ని ఆరోగ్యకరమైన అలవాట్లను పాటించడం ద్వారా ఉదయం షుగర్ పెరగడాన్ని చాలావరకు నియంత్రించవచ్చు.

ఉదయం నిద్రలేవగానే నీరు తాగండి

రాత్రంతా శరీరానికి నీరు అందకపోవడంతో స్వల్ప డీహైడ్రేషన్ ఏర్పడుతుంది. దీంతో రక్తంలో గ్లూకోజ్ సాంద్రత పెరిగే అవకాశం ఉంటుంది. అందుకే ఉదయం లేవగానే ఒక గ్లాసు నీరు తాగడం మంచి అలవాటు.

రోజూ వ్యాయామం చేయండి

రోజూ కనీసం 30 నిమిషాలు నడక, యోగా లేదా తేలికపాటి వ్యాయామం చేయడం వల్ల శరీరం ఇన్సులిన్‌ను సమర్థంగా ఉపయోగించుకుంటుంది. దీంతో రక్తంలో చక్కెర స్థాయిలు నియంత్రణలో ఉంటాయి. కొంతమందికి సాయంత్రం వ్యాయామం చేయడం కూడా ఉదయం షుగర్ పెరగకుండా సహాయపడుతుంది.

అల్పాహారం మానేయొద్దు

ఉదయం అల్పాహారం చేయకపోతే రక్తంలో చక్కెర స్థాయిలు అస్థిరంగా మారే అవకాశం ఉంది. గుడ్లు, పెరుగు, పప్పులు, ఓట్స్, మిల్లెట్స్, పండ్లు, నట్స్ వంటి ప్రొటీన్, ఫైబర్ ఎక్కువగా ఉండే ఆహారం తీసుకుంటే షుగర్ నియంత్రణకు ఉపయోగపడుతుంది.

టీ, కాఫీ పరిమితంగా తీసుకోండి

ఉదయం ఎక్కువ కెఫిన్ తీసుకోవడం కొంతమందిలో రక్తంలో చక్కెర స్థాయిలను పెంచే అవకాశం ఉంది. కాబట్టి టీ, కాఫీని పరిమితంగా తీసుకోవడం మంచిది. మీ శరీరం ఎలా స్పందిస్తుందో గమనిస్తూ అలవాట్లను మార్చుకోవాలి.

తగినంత నిద్ర తప్పనిసరి

రోజుకు 7–8 గంటలు నాణ్యమైన నిద్ర లేకపోతే ఒత్తిడి హార్మోన్లు పెరిగి రక్తంలో చక్కెర స్థాయిలు అధికమవుతాయి. కాబట్టి ప్రతిరోజూ ఒకే సమయానికి నిద్రపోవడం, లేవడం అలవాటు చేసుకోవాలి.

ఒత్తిడిని తగ్గించండి

మానసిక ఒత్తిడి కూడా షుగర్ పెరగడానికి ఒక కారణం. ధ్యానం, ప్రాణాయామం, యోగా లేదా మీకు ఇష్టమైన పనుల్లో సమయం గడపడం ద్వారా ఒత్తిడిని తగ్గించుకోవచ్చు.

మందులు సమయానికి తీసుకోండి

వైద్యులు సూచించిన మందులు లేదా ఇన్సులిన్‌ను సమయానికి తీసుకోవడం చాలా ముఖ్యం. ఉదయం షుగర్ తరచుగా ఎక్కువగా ఉంటే తప్పనిసరిగా వైద్యులని సంప్రదించి చికిత్సలో మార్పులు అవసరమా తెలుసుకోవాలి.

రాత్రి భోజనం తేలికగా చేయండి

రాత్రి ఆలస్యంగా లేదా ఎక్కువగా భోజనం చేయడం వల్ల రక్తంలో చక్కెర స్థాయిలు రాత్రంతా ఎక్కువగా ఉండే అవకాశం ఉంటుంది. కాబట్టి నిద్రకు కనీసం 2–3 గంటల ముందే తేలికపాటి భోజనం చేయడం మంచిది. ముఖ్యంగా అన్నం, స్వీట్లు, శుద్ధి చేసిన కార్బోహైడ్రేట్లు తగ్గించి, ప్రొటీన్ ఎక్కువగా ఉండే ఆహారం తీసుకోవాలి.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ఫ్రిజ్ లేకుండానే టమోటాలు ఎక్కువ రోజులు తాజాగా ఉండాలా?

ఈ తేదీల్లో పుట్టినవారిది రాజసమైన వ్యక్తిత్వం..!