ఈ ఆయుర్వేద కషాయాలతో వర్షాకాలంలో జలుబుకు చెక్!

ఇంటర్నెట్ డెస్క్: వర్షాకాలంలో వాతావరణంలో మార్పుల కారణంగా జలుబు, దగ్గు, గొంతునొప్పి, జీర్ణ సమస్యలు వంటి ఇబ్బందులు ఎక్కువగా కనిపిస్తుంటాయి. ఇలాంటి సమయంలో శరీరానికి వెచ్చదనం కలిగించేందుకు, సాధారణ ఆరోగ్యానికి తోడ్పడేందుకు చాలామంది ఆయుర్వేద కషాయాలను తాగుతుంటారు. తులసి, అల్లం, పసుపు, మిరియాలు, దాల్చినచెక్క వంటి సహజ పదార్థాలతో తయారుచేసే ఈ కషాయాలు ఆరోగ్యానికి మేలు చేస్తాయని నిపుణులు సూచిస్తున్నారు.

తులసి – అల్లం కషాయం

తులసి–అల్లం కషాయం తయారు చేయడానికి 10 నుంచి 12 తులసి ఆకులు, ఒక అంగుళం అల్లం ముక్క, నాలుగు నల్ల మిరియాలు, చిన్న దాల్చినచెక్క ముక్క, రెండు లవంగాలు, రెండు కప్పుల నీరు తీసుకోవాలి. ముందుగా నీటిని మరిగించి అందులో అన్ని పదార్థాలను వేసి 10 నుంచి 15 నిమిషాలు సన్నని మంటపై మరిగించాలి. తర్వాత వడకట్టి కొద్దిగా చల్లారిన అనంతరం కావాలనుకుంటే తేనె కలిపి తాగవచ్చు.

పసుపు – నల్ల మిరియాల కషాయం

పసుపు–నల్ల మిరియాల కషాయం తయారు చేయడానికి అర టీస్పూన్ పసుపు పొడి, అర టీస్పూన్ నల్ల మిరియాల పొడి, ఒక అంగుళం అల్లం ముక్క, చిన్న దాల్చినచెక్క ముక్క, రెండు కప్పుల నీరు తీసుకోవాలి. ముందుగా నీటిలో అన్ని పదార్థాలను వేసి 12 నుంచి 15 నిమిషాల పాటు సన్నని మంటపై బాగా మరిగించాలి. అనంతరం వడకట్టి గోరువెచ్చగా తాగాలి. కావాలనుకుంటే కషాయం కొద్దిగా చల్లారిన తర్వాత ఒక టీస్పూన్ తేనె కలిపి తీసుకోవచ్చు.

లవంగం – దాల్చినచెక్క కషాయం

లవంగం – దాల్చినచెక్క కషాయం తయారు చేయడానికి నాలుగు లవంగాలు, చిన్న దాల్చినచెక్క ముక్క, రెండు కప్పుల నీరు తీసుకోవాలి. ముందుగా లవంగాలు, దాల్చినచెక్కను స్వల్పంగా దంచి నీటిలో వేయాలి. సుమారు 15 నిమిషాల పాటు సన్నని మంటపై బాగా మరిగించాలి. అనంతరం వడకట్టి గోరువెచ్చగా తాగాలి. ఈ కషాయం సువాసనతో పాటు వెచ్చదనాన్ని కూడా అందిస్తుంది.

వేప – పసుపు కషాయం

వేప – పసుపు కషాయం తయారు చేయడానికి 5 నుంచి 6 శుభ్రమైన వేప ఆకులు, అర టీస్పూన్ పసుపు పొడి రెండు కప్పుల నీరు తీసుకోవాలి. ముందుగా నీటిలో అన్ని పదార్థాలను వేసి 12 నుంచి 15 నిమిషాల పాటు సన్నని మంటపై బాగా మరిగించాలి. అనంతరం వడకట్టి గోరువెచ్చగా తాగాలి. ఈ కషాయం కొద్దిగా చేదుగా ఉండవచ్చు. గర్భిణులు, చిన్నపిల్లలు, వృద్ధులు లేదా దీర్ఘకాలిక అనారోగ్యంతో బాధపడుతున్నవారు వైద్యుల సలహాతోనే కషాయాలు తీసుకోవాలి.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

తులసి ఆకులు నమిలితే కిడ్నీ స్టోన్స్ కరిగిపోతాయా?

ఈ డ్రై ఫ్రూట్స్‌ను మితంగా తినాలి.. ఎక్కువగా తింటే డేంజర్