ఎర్రమల్లె

మల్లి మల్లి మల్లెపువ్వోలే మా ఎర్రమల్లె

మల్లి ముద్దుగ మొగ్గ తొడగాలే

మల్లి మల్లి మల్లెతీగోలే మా ఎర్రమల్లె

మల్లి ముద్ద పందిరవ్వాలే –

నిశీధి తోటల్లో నిదురించే కన్నుల్లో

ఒక రెమ్మ మమ్ము తాకిందే మా ఎర్రమల్లె

తాకిన ఆ రెమ్మ అమ్మ ఒడిలా పరచుకుంటే

మా కల పసిపాప అయిందే మా ఎర్రమల్లె –

చిక్కని చీడల్లో చెదిరిన నీడల్లో

పూలెన్నోరాలిపోయాయే మా ఎర్రమల్లె

రాలిన ఆ పూలు నీ గుర్తులవుతుంటే

మా గుండెలు మబ్బులయ్యాయే మా ఎర్రమల్లె –

నిస్సార లోతుల్లో నిశ్శబ్ద జీవుల్లో

భూచెక్కిలి నెర్రబారిందే మా ఎర్రమల్లె

నేల నెర్రబారుల్లో నల్లగాలి నడవంగా

మట్టి పువ్వై పరిమళించి మా ఎర్రమల్లె –

వాడిన వనంలో ఓడిన జనంలో

నీ ఊహ ఊపిరవ్వాలే మా ఎర్రమల్లె

ఊపిరి పరాగమై పూత పట్టి కూత వేస్తే

వనం పూల జనం అవుతుందే మా ఎర్రమల్లె

లెల్లే సురేష్

ఈ వార్తలనూ చదవండి:

ప్రపంచంలో అతిపెద్ద ఏఐ టెక్‌ కంపెనీగా టీసీఎస్‌

బంగారంలో పెట్టుబడులకు గోల్డ్‌ ఈటీఎఫ్‌, ఈజీఆర్‌లు