కొన్నిసార్లూ... చాలాసార్లూ,

ఎక్కడో పులి పొంచి ఉండి ఊర్కే చూస్తున్నట్టు

వీణతంత్రి చిట్లి శబ్దరజనును విస్ఫోటిస్తున్నట్టు

అవి

చీకట్లో దాగుడుమూతలు కావచ్చు

గాఢ రజోకాంతి అతిప్రతిఫలనలు కావచ్చు

లేక

ఆ నలుపు దేవత కృష్ణవర్ణోషస్సు కావచ్చు,

అన్నీ.. పడుగు పేక దారాల్లా

ఉన్నట్టుండి ఆలోచనలు చిక్కులు పడ్తూంటాయి

చైతన్య అస్రవంతి గడ్డకడ్తూ గడ్డకడ్తూ

నడక ఒక సరళహరాత్మక గమనం-

నా గురించి నీకు తెలియాలంటే

నువ్వు నా ప్రపంచపు లోలోతుల్లోకి

ఏ పాతాళగరిగెకూ దొరక్కుండా పయనించీ పయనించీ

చేరుకోవాలె

అప్పుడు అసలు నువ్వూ నేనూ వేర్వేరు కామని తేలిపోతుంది-

ఏ నియమమూలేని అనియమ సిద్ధాంతం ప్రకారం

అరాచకత్వం కాని రాచకత్వపు ఒక అంతఃజ్వాల

వెలుగుతూ వెలుగుతూ

ఒక స్తబ్ధించే అఖండ నృత్యహేల ఐ

పాదాలు విశ్రమించవు

గాజుముక్కలపై తకథిమి తకథిమి

అన్నీ తడి ఆరని రక్తపాదముద్రలే-

నీకు తెలుసా

చివరికి ఎక్కడా ఏమీలేదని తెలుస్తున్నపుడు

కొన్నిసార్లు గెలుస్తూ, చాలాసార్లు ఓడిపోతూ జీవించడానికి

భయమెందుకూ..? సిగ్గెందుకూ..!

రామా చంద్రమౌళి

9390109993

ఈ వార్తలు కూడా చదవండి

పల్నాడు జిల్లాలో దారుణం.. ఆరేళ్ల కుమారుడికి గడ్డి మందు తాగించిన తండ్రి..

నటుడు ప్రకాశ్ రాజ్ వ్యాఖ్యలపై ఫైర్ అయిన బీజేపీ నేత విష్ణువర్ధన్ రెడ్డి