ఐటీఐ విద్యార్థులకూ ఐఐటీ గ్రాడ్యుయేట్లతో సమాన గౌరవం దక్కాలి: మంత్రి నారా లోకేశ్
ABN , Publish Date - Nov 22 , 2026 | 01:50 PM
ఏఐ యుగంలో సాంకేతిక నైపుణ్యాలకు మరింత ప్రాధాన్యత పెరుగుతోందని ఏపీ మంత్రి నారా లోకేశ్ పేర్కొన్నారు. ఐఐటీ గ్రాడ్యుయేట్లకు లభించే గౌరవం ఐటీఐ విద్యార్థులకు కూడా దక్కాలని, వృత్తి విద్యను తక్కువగా చూసే ధోరణి మారాలని పిలుపునిచ్చారు.
అమరావతి, నవంబరు 22: ఐఐటీ (IIT) విద్యార్థులకు లభించే గౌరవం, గుర్తింపు ఐటీఐ (ITI) విద్యార్థులకు కూడా సమానంగా దక్కాలని ఆంధ్రప్రదేశ్ ఐటీ, విద్యాశాఖ మంత్రి నారా లోకేశ్ ఆకాంక్షించారు. నైపుణ్య ఆధారిత విద్య, వృత్తి విద్యకు సమాజంలో మరింత ప్రాధాన్యత కల్పించాల్సిన అవసరం ఉందని పేర్కొన్నారు. ఈ అంశంపై ఎక్స్ (X) వేదికగా స్పందించిన ఆయన.. దీనిని ప్రస్తావించినందుకు ప్రధానమంత్రి నరేంద్ర మోదీకి ధన్యవాదాలు తెలిపారు.
ప్రస్తుతం ప్రపంచం ఆర్టిఫిషియల్ ఇంటెలిజెన్స్ (AI) ఆధారిత సాంకేతిక మార్పుల దిశగా వేగంగా అడుగులు వేస్తోందని, ఈ నేపథ్యంలో సాంకేతిక పరిజ్ఞానంతో పాటు ఆచరణాత్మక నైపుణ్యాలు కలిగిన కార్మికులకు భవిష్యత్తులో విస్తృతమైన ఉపాధి అవకాశాలు లభిస్తాయని వివరించారు. పరిశ్రమలు, తయారీ రంగాల్లో నైపుణ్యం కలిగిన మానవ వనరుల అవసరం మరింత పెరగనుందని, కేవలం అకడమిక్ విద్యకే కాకుండా వృత్తి విద్యకు కూడా సముచిత గుర్తింపు ఇవ్వాలని అభిప్రాయపడ్డారు. ఐటీఐ విద్యను అభ్యసించే విద్యార్థుల్లో ఆత్మవిశ్వాసం పెంపొందించడంతో పాటు వారు ఎంచుకున్న వృత్తి పట్ల గర్వపడేలా సమాజంలో సానుకూల దృక్పథం ఏర్పడాలని లోకేశ్ పేర్కొన్నారు.