Viral Video: విమానం ఎక్కుతూ ట్రంప్ తడబాటు.. కొంచెం ఉంటే..

అమెరికా అధ్యక్షుడు డొనాల్డ్ ట్రంప్‌కు గడ్డు కాలం నడుస్తోంది. మిత్రుడు ఎలన్ మస్క్ కాస్తా శత్రువైపోయాడు. ప్రతీ విషయంలో ట్రంప్‌కు అడ్డుగా నిలుస్తున్నాడు. మస్క్ కారణంగా ట్రంప్ తీవ్ర ఇబ్బందుల పాలవుతున్నాడు. ఈ నేపథ్యంలోనే ఆయన మానసిక ఒత్తిడికి గురవుతున్నట్లు తెలుస్తోంది. ఓ వైపు మస్క్ తలపోట్లు .. మరో వైపు పని ఒత్తిడితో అల్లాడుతున్న ఆయన తాజాగా, విమానం మెట్లపై కాలు జారారు. కొంచెం ఉంటే మెట్ల మీద నుంచి కిందపడిపోయేవారు.

అదృష్టం బాగుండి ఆ ప్రమాదం నుంచి తప్పించుకున్నాడు. ఈ సంఘటన ఆదివారం చోటుచేసుకుంది. ఇందుకు సంబంధించిన వివరాల్లోకి వెళితే.. డొనాల్డ్ ట్రంప్ ఆదివారం న్యూజెర్సీలోని మారీస్ టౌన్ మున్సిపల్ ఎయిర్‌పోర్టులో విమానం ఎక్కుతూ ఉన్నారు. మెట్ల మీద నడుచుకుంటూ పైకి వెళుతూ ఉన్నారు. కుడి చేత్తో రేయిలింగ్ పట్టుకుని నడుస్తూ ఉన్నారు. ఈ నేపథ్యంలో ఓ మెట్టు మీద కాలు పెట్టారు.

మెట్టు చివరన కాలు పెట్టడంతో .. కాలు జారింది. వెంటనే నిలదొక్కుకున్నాడు. కుడి చెయ్యి రేయిలింగ్‌ను పట్టుకుని ఉండటంతో మోకాళ్లపై కింద పడకుండా ఆగాడు. ఆ వెంటనే పైకి లేచి, టకటకా అక్కడినుంచి వెళ్లిపోయాడు. ప్రస్తుతం ఇందుకు సంబంధించిన వీడియోలు సోషల్ మీడియాలో వైరల్‌గా మారాయి. ఆ వీడియోలను బాగా గమనిస్తే.. తడబడ్డానికి ముందు ట్రంప్ ముఖంలో ఏదో తెలియని బాధ స్పష్టంగా కనిపిస్తూ ఉంది. ఎంతో నిరాసక్తంగా ఆయన మెట్లు ఎక్కుతూ ఉన్నారు. ఈ నేపథ్యంలోనే తడబడ్డారు.